Thursday, February 24, 2011
NAUKAY ang katawhan human nasapon sa usa ka bana ang iyang asawa nga walay sapot ug kauban ang laing lalaki niadtong nilabay nga adlaw sa Agora ning siyudad sa Cagayan de Oro.
Ang kapolisan sa Police Station 3 (PS3) sa Agora nga nahinabi sa Sun.Star Superbalita nihangyo nga tagoan lamang ang mga pangalan sa biktima sa pagpanalipod kanila sa kaulawon.
Nasayran nga personal nga nagpatabang sa kapolisan ang bana kinsa tagoan sa ngalan nga Rommel ug nagtrabaho isip usa ka taxi driver ug nisaysay nga mibiya siya sa ilang panimalay buntag niadtong nilabayng adlaw dihang nakita ang iyang asawa nga adunay gipalit sa usa ka tindahan.
Miserbato ang bana apan wala kini madungog sa iyang asawa hinungdan nga natingala pag-ayo si Rommel sa wala pagtagad sa iyang asawa labina nga dili man kini kaayo mogawas sa lawak.
Mipadayon sa pagpamasayro si Rommel apan pagbalik niini nagdesisyon nga mohapit una sa ilang giabangan nga lawak apan nakurat pag-ayo ang bana dihang pag-abri sa lawak nakita ang iyang asawa ug ang usa ka lalaki nga pulos walay mga sapot ug iyang naaktuhan ang lalaki nga mipatong pa sa iyang asawa.
Sa kakurat sa maong lalaki kalit kining mibangon ug migawas sa lawak sa kahadlok dihang nakita ang bana.
Wala na usab gisunod ni Rommel ang lalaki tungod kay wala siya makalihok sa iyang nakita.
Naukay usab ang katawhan dihang midagan ang maong lalaki ang walay sapot sa lawas tunga sa dalan.
Si Rommel nga misaysay sa kapolisan gibati og kasuko ngadto sa iyang asawa ug sa pagluib niini ug andam niyang pasakaan og kaso labina nga dili niya madawat ang gibuhat sa iyang asawa.
Giingong dako ang pagsalig niini sa iyang asawa ug maglisod kini pagpasaylo sa gihimo kaniya.
Giingong magsige og pangayo sa pasaylo ang asawa sa biktima ning panahona. (Stephanie V. Berganio)
Gipatik sa mantalaang SuperBalita Cagayan de Oro Pebrero 24, 2011.
Linkback:
https://tubagbohol.mikeligalig.com/index.php?topic=38191.0
