ARMAS sa pulis giilog, gium-um ug gipabuto sa usa ka lalakeng sakop sa usa ka fraternity sulod mismo sa San Nicolas Police Station kagahapon sa alas 10:45 sa buntag.
Si Gorio (di tinuod niyang ngan), 35, ulitawo, sakop sa Alpha Phi Omega (APO) kanhi isip guide sa river rafting, taga Apoville, Cagayan de Oro City, naa sa kritikal nga kondisyon sulod sa Cebu City Medical Center (CCMC) tungod sa samad sa iyang baba ug pagkabuak sa iyang apapangig nga naigo sa bala 9 mm pistol ni PO2 Antonio Alister Tejero, 37, sakop sa San Nicolas Police Station sa Cebu City Police Office (CCPO).
Ang bala wa makalapos ug niungot sa may tangkugo sa biktima.
INILUGAY
Si Tejero nga nahinabi sa mga tigbalita nagkanayon nga nagtuo gyud siya nga pusilon ni Gorio niadtong higayuna.
Sumala niya nga gikan siya sa Police Regional Office (PRO-7) dihang nideretso siyag sulod sa room sa 1st responder team diin iyang gibutang ang iyang helmet.
Iyang nakita si Gorio nga naglingkod nga wa magtingog, apan nakurat na lang siya dihang kalit nga giilog ang iyang 9mm pistol hinungdan nga iyang gitapi.
Apan nailog gyud niini ang armas hinungdan nga nahitabo ang ilang nilayugay hangtud nga iyang gikabay-an aron ma-neutralize.
Apan nakahimo pa sa pag-inggansa sa armas ang biktima, dayon gium-om sa baba ang armas ug gipabuto.
Human niini nalagpot ang armas gidali niya sa pagkuha.
Iyang nakita ang biktima nga nagkadugo ug nagsuwat sa sawog pinaagi sa iyang tudlo gamit ang kaugalingong dugo nga “Sori B.â€
Hman niini, gidali niya sa pagdala sa CCMC.
“Nagtoo man ko nga akoy tuyo niyang pusilon dihang giilog ang akong armas. Pero nag-unay man siya sa kaugalingon,†dugang ni Tejero.
PROBLEMA
Gipadayag niiya nga presence of mind lang gyud siya niadtong higayuna dihang naglayugay sila ni Gorio, apan dihang nibuto ang iyang armas, nagtuo sab siya nga siyay naigo.
Andam siya sa bisan unsang imbestigasyon hinungdan nga nibulontaryo siyang mipaubos sa parrafin test kagahapong adlawa.
Si Chief Insp. Noel Lomente, hepe sa San Nicolas Police Station, nagkanayon nga si Gorio, sa ilang pag-backgruond check, dunay problema sa kaugalingon ingon man sa pamilya.
Gibutyag niya nga ang iyang sakop nga si SPO4 Sanrico Gole-Gole, team leader 1st responder team, maoy nidala niini sa police station human magpakamatay unta si Gorio niadtong Dominggo sa alas 11 sa gabii pinaagi sa pag-ambak sa taytayan sa South Road Properties (SRP).
Ang family friend ni SPO4 Gole-Gole kinsa nagpuyo sa Deca Homes sa Talisay City may nitawag niini nga nangayog panabang tungod kay kini dunay problema.
Tungod niini mi-respondi ang iyang sakop ug gidala sa ilang buhatan ug gimaymayan sa iyang mga problima ug gipapahulay hangtud kagahapon sa buntag.
Nagdungan pa pamahaw sa iyang sakop si Gorio.
Si Sarah Jane Recla, hepe sa Homicide Section sa Cebu City Police Office nga nahinabi sa Sun.Star Superbalita, niingon nga ila pang palawman ang imbestigasyon kalabot niini.
Giklaro niya nga ilang gipa-ubos sa paraffin test si Tejero ug imbestigaron pinasubay sa proseso sanglit kining iyang giluwatang pamahayag iya pa man kining version.
Alang kaniya magdependi na lang unya sa dagan sa imbestigasyon kon unsay tinuoray nga nahitbao kon tinuod ba gayud nga nangilog armas o wala.
NABUAK
SPO1 Ruth Violango, imbestigador sa Homicide Section sa CCPO nga nahinabi sa Sun.Star Superbalita miingon nga ang bala mi-ungot sa tangkugo ni Cagulada human nabuak ang apapangig niini.
Hinuon ang doktor sa CCMC mipahibawo kanila kagahapon nga stable ang kahimtang niini.
Na-recover sa crime scene ang usa ka 9mm pistol nga puno sa mga bala ug usa ka kabhang niini.
Linkback:
https://tubagbohol.mikeligalig.com/index.php?topic=57662.0
