SUPERBALITA-DAVAO
JEEPY P. COMPIO
NAKURAT ang mga kustomer sa usa ka balay kalingawan sa Poblacion sa Toril human misulong ang usa ka asawa kay iyang nasakpang misabak-sabak sa guest relation officer (GRO) ang iyang mister alas 11:00 sa gabii niadtong Dominggo.
Si alyas Nerissa, 42, nagpuyo sa San Guillermo, Barangay 22-C Poblacion, nagsaysay sa Sun.Star Superbalita sa nahitabo tali sa iyang kumare nga si alyas Mercy, 44, taga Barangay Daliao, Toril District, kay nasakpan niini iyang mister nga maayo kaayong nagsabak sa GRO.
Nasayran nga napungot na si Mercy dihang wala kauli ang iyang mister, apan bandang alas 10:00 sa gabii, gi-text-san siya sa iyang higala kung asa nagtagay iyang mister.
Giingon nga sa kalagot ni Mercy, nagdala siya og taklob sa kaldero ug luwag dayon gibagting-bagting sa hawanan sa tunga sa videoke house.
Dihang mikalma ang tanan, iyang gipagawas iyang mister ug gihampak sa iyang dalang taklob sa kaldero ug luwag.
"Basta, enjoy kaayo ang dapit kay mora'g naay taping sa kataw-anan nga pelikula," saysay ni Nerissa sa Superbalita.
Daling miuli ang mister tungod sa hitabo, samtang wala na sab nagpatala sa buhatan sa Toril Police Station ang tagdumala sa balay kalingawan, gumikan nananghid nang daan si Mercy kanila sa iyang buhaton. --
http://www.sunstar.com.ph/superbalita-davao/balita/2015/04/06/Linkback:
https://tubagbohol.mikeligalig.com/index.php?topic=79753.0
