Ni Bryner L. Diaz, GMR (Banat) | Updated May 31, 2015 - 12:00am
CEBU, Philippines - Patay ang usa ka 70-anyos nga lolo nga nadasmagan sa usa ka PUJ atubangan sa Lahug Elementary School sa niagi’ng hapon sa barangay Lahug, dakbayan sa Sugbo.
Ang namatay naila nga si Jesus Abella, taga Sunset Drive, Lahug samtang ang nakabangga mao si Leoncio Lana, 24, drayber sa jeep nga 04L ang rota.
Base sa imbestigasyon sa kapolisan nga ang biktima nisuway unta og labang tungod kay mopalit unta og sud-an bisan naglisud na og lakaw.
Wala nakabantay ang drayber sa jeep tungod kay bag-o lang kini ni-overtake og laing jeep hinungdan nga napunggit ang tiguwang.
Napasok ilawom sa jeep ang tiguwang ug nakaangkon og grabe’ng kadaut sa iya’ng lawas hinungdan nga gidala dayun siya sa Vicente Sotto Memorial Medical Center apan namatay pipila ka takna ang nilabay. Ang drayber sa jeep kasamtangan nga gitanggong sa Fuente Police Station. (BANAT NEWS)
Linkback:
https://tubagbohol.mikeligalig.com/index.php?topic=80074.0
