Ni Flor V. Querubin
Thursday, October 11, 2012
GITUOHAN nga panimawos maoy motibo sa pagpusil sa amahan ug anak sa Sto. Niño Village, barangay Basak Lapu-Lapu City sa miaging gabii nga miresulta sa hinanaling kamatayon sa batan-ong biktima.
Kini tungod kay ang anak gilambigit sa kasong pagpamusil sa miaging tuig.
Base sa nahipos nga impormasyon sa Homicide Section sa Lapu-Lapu City Police Office nga niadtong Miyerkules sa alas 7:30 sa gabii, tulo ka mga tawo ang kalit nga ningsulod sa balay sa pamilyang Oroneo agi sa kusina.
Sigon pa sa asoy sa anak ug igsuon sa mga biktima nga si April Oronea, 19, dalaga, nga nangita ang mga suspek sa iyang maguwang nga si Michael Angelo Oroneo, 20, ulitawo, way trabaho.
Diha ra ang mga biktima sa ilang balay nga sila si Michael ug amahan niini nga si Allan, 57, dayon gipamusil sa mga suspek nga naila lang sa mga ngalan nga Poy ug kaluha nga Bikbik ug Bokbok.
Ang batan-ong Oroneo samdan sa wala nga bahin sa iyang dughan samtang ang amahan samaran sa iyang wala nga paa ug tiyan.
Gideklarar nga dead-on-arrival (DOA) si Michael sa dihang gidala sa Lapu-Lapu City Hospital samtang gitabang sa mga nanambal sa usa ka ospital sa dakbayan Sugbo si Allan.
Giingong nanagan lang ngadto sa hilit ug ngitngit nga dapit ang tulo ka mga suspek.
Ang Homicide Section nakahipos og upat ka mga basiyo nga bala sa gituohan sa kalibre .45 pistola.
Sa gihimong pagsubay sa mga sakop ni P/Insp. Zenaido Pastorfide ilang nasayran nga si Michael Angelo Oronea gikataho nga nalambigit sa pagpamusil sa grupo ni Poy sa miaging tuig.
Gani adunay nasamdan sa maong hitabo.
Gidudahan nga hayan nanimawos ang maong mga suspek sa banay’ng Oronea.
Kagahapon sa buntag natultolan sa Homicide Section ang gipuy-an sa gihinganlan og Poy apan nagdumili kini sa pagpasulod sa mga pulis.
Wa usab sila makasulod kay taas kaayo ang paril nga naglibot sa balay niini.
Hugtanong gipanghimakak ni Poy ang maong pasangil human siya gipahibawo nga usa siya sa gitudlo nga suspek sa pagpusil patay kang Michael ug pagka-angol sa amahan niini nga si Allan.
Gipatik sa mantalaang SuperBalita Cebu Oktubre 12, 2012.
Linkback:
https://tubagbohol.mikeligalig.com/index.php?topic=55811.0
