Sunday, May 15, 2011
PATAYA dihadiha ang usa ka ulitawo human girakrakan sa usa ka armadong lalake sa Barangay Talaga, lungsod sa Argao, pasado alas 2:00 kagahapon sa kaadlawon.
Ang biktima nailhan nga si Nikki Sawey , 25, molupyo sa sa nahisgutang dapit ug anak sa first barangay councilor sa Talaga nga si Corazon Sawey.
Matod ni PO2 Benjamin Geyrozaga sa pakighinabi sa Sun.Star Superbalita, ang biktima gikan namista ug nagdisko sa Balisong.
Giingong gisundan na daan ang biktima samtang padung na siya mopauli sa ilang panimalay apan wa mailhing ang lalaki nga mamumuno nga nagsakay sa pulang nga Honda XRM.
Dugang ni PO2 Geyrozaga sa dihang naabot na ang biktima sa ilaha, nanuktok siya sa ilang pultahan ug gitawag niini ang iyang igsuon nga si Chyle Sawey aron siya ablihan apan wa siya makadayon pagsulod kay diha-diha girakrakan sa makadaghang higayon ang biktima.
Nakaangkon kini og multiple gunshot wounds nga maoy hinungdan sa iyang hinanaling kamatayon.
Giingon nga ang biktima aduna na daa’y record gumikan sa pag-unay niyag kulata sa iyang inahan.
Samtang nakuha sa mga kapulisan ang unom ka kabhang sa bala sa .45 caliber pistol sa crime scene.
Hinuon, wa pa masuta sa mga kapulisan ang tinuod nga motibo sa pagpatay ni Sawey ug padayon pa gihapon ang imbestigasyon niining maong insidente. Mariel L. Denila, Ronalyn Therese A. Miranda & Daisy Dawn E. Noel CNU Communication Interns
Gipatik sa mantalaang SuperBalita Cebu Mayo 16, 2011. Linkback:
https://tubagbohol.mikeligalig.com/index.php?topic=40791.0
