Ni GUAM P. LOGROÑO
ANG sigarilyo usa sa mga gitumbok nga hinungdan sa taas nga mga insidente kamatayon tuÂngod sa cancer.
Apan mahimo diay nga ikaw mamatay og sayo kon magpataka ka og sunod sa imong bisyo sa sigarilyo.
Di ka na makahuna-huna kon kini kuyaw basta matambalan lang ang imong gana sa pagyosi.
Tungod niini, usa ka 18-anyos nga trabahante namatay kay nakuryentihan niadtong Lunes sa alas 8:10 sa buntag human niya gigamit isip dagkutanan sa sigarilyo ang welding rod.
Si Angelo Empas, ulitawo, taga Barangay Lusong, Tuburan, Sugbo, kawani sa Thunder Cock Farm, patay nang nakaplagan sa iyang mga kauban.
Si PO2 Ronilo Quirante, desk officer sa Dumanjug Police Station nga naÂhinabi sa Sun.Star Superbalita, nagkanayon nga ang biktima nanghuwam og lighter sa iyang mga kaubang trabahante kay manigarilyo.
Pero wa siya maÂkaÂulos hinungdan nga nibalik si Empas sa ilang bunkhouse nga nag-inusara aron mangita og kadagkutan.
Nakugang ang iyang mga kauban dihang nakit-an siya duol sa welding machine nga nagbuy-od.
Sumala pa ni Quirante nga ang biktima hayan nigamit sa welding machine pinaagi sa welding rod sa pagduslit sa sigarilyo.
Apan tungod kay basa ang lugar kay nag-uwan-uwan, mi-ground ang welding machine hinungdan nga siya nakuryentihan ug namatay diha-diha.
Napalgan tupad sa iyang lawas ang welding rod.
Wa hinuoy foul play nga nakita ang kapulisan sa kamatayon sa biktima.
Gipatik sa mantalaang SuperBalita Cebu Hunyo 10, 2015.
Linkback:
https://tubagbohol.mikeligalig.com/index.php?topic=80172.0
