Ni Seth delos Reyes
SuperBalita Davao
Friday, September 21, 2012
USA ka pulis kinsa sakop sa Highway Patrol Group (HPG) ang naangol human gibanggaan sa motorsiklo nga ilang gipara sa checkpoint didto sa Km. 25, Licanan, Bunawan District, siyudad sa Davao alas 7 sa gabii niadtong Huwebes.
Nasayran nga inay nga mohunong ang drayber sa motorsiklo sa dihang gipara, mipaturatoy na hinuon kini og padagan ug gibanggaan ang pulis.
Samtang angol sab ang drayber sa motor nga mibangga sa pulis.
Ang pulis nga naangol giila nga si Police Officer 3 (PO3) Reynaldo Deypalubos, 49, samtang ang drayber sa motor nailhan sab nga si Adolfo Buot Singson, 55, taga-Indangan, Buhangin ning siyudad.
Subay sa imbestigasyon sa Bunawan Police Station, nasayran nga gipara ni PO3 Reynaldo Deypalubos, 49, uban sa laing pulis nga wa panganli, ang Skygo nga motor nga gimaneho ni Singson.
Apan inay nga mopatuo sa pagpahunong kaniya, gibanggaan na hinuon ni Singson ang pulis nga nag-checkpoint hinungdan nga nalagpot si Deypalubos ug nahaybol sab ang motorsiklo.
Sila Deypalubos ug Singson pulos gisapupo sa mga nakasaksi sa hitabo ug gidala sa Southern Philippines Medical Center (SPMC).
Apan tungod puno sa pasyente ang maong ospital, gibalhin sila sa Davao Doctors Hospital (DDH) ug didto gidapatan og medikasyon.
Sa gihimong pagpanubay sa Superbalita nasayran nga kritikal ang kahimtang sa pulis human mapuruhi ang iyang tiil.
Samtang ang drayber sa motor ug angkas niini nga si Wilfredo Guerra pabilin sab nga giatiman sa balay tambalanan tungod samad ug pangos nga ilang naangkon.
Nasayran si Singson walay lisensiya ug wa say dokumento ang iyang motorsiklo.
Padayon pa ang imbestigasyon sa kapulisan sa maong hitabo.
Linkback:
https://tubagbohol.mikeligalig.com/index.php?topic=54920.0
