Ni Stephanie Viovicente-Berganio
Tuesday, March 15, 2011
NAGHIKOG ang usa ka amahan pinaagi sa pagtigbas-tigbas niini sa iyang bukton niadtong Domingo mga alas 9:00 sa gabii didto sa Barangay Linangkayan, lungsod sa Naawan, Misamis Oriental.
Giila ang biktima mao si Melbert Madriano, 34, taga Purok-2, susamang lungsod.
Gisaysay sa asawa niini nga grabe kaayo kahubog ang iyang bana niadtong gabhiona ug dihang miuli sa puloy-anan kalit lang kining mikuha og sundang ug naglasong.
Unang gitigbas niini ang kaugalingon labina sa iyang bukton ug kamot ug nagsige og yawyaw nga walay pulos iyang kinabuhi.
Naglasong ang biktima ug sa kahadlok sa asawa nga apil tigbason nagpatabang kini sa iyang mga silingan hinungdan nga nagparespondehan og polis gikan sa Naawan Police Station.
Dihang mireponde ang kapolisan gibadlong si Madriano ug giilog ang iyang sundang nga dala apan misukol kini sa polis hinungdan nga gipusil sa mirespondeng polis niadtong gabhiona.
Naigo ang paa sa biktima usa pa kini nahilom ug nabuhian ang sundang nga dala.
Dali nga gidala sa mga polis ang biktima sa Northern Mindanao Medical Center ning siyudad sa Cagayan de Oro kinsa padayon pa nga giatiman sa mga doktor sulod sa emergency room ning panahona.
Wala usab gibasol sa asawa ang polis nga nakapusil niini labina nga dako man sayop sa iyang bana.
Gipatik sa mantalaang SuperBalita Cagayan de Oro Marso 15, 2011.
Linkback:
https://tubagbohol.mikeligalig.com/index.php?topic=39029.0
