Ni Lesley Caminade-Vestil/EIM (Banat) Updated August 05, 2012 12:00 AM
CEBU, Philippines - Mokabat sa P10 milyones ang danyos sa nahitabong sunog sa usa ka manokan sa barangay Magdugo syudad sa Toledo pasado alas-3 sa kaadlawon kagahapong adlawa.
Sa pakighinabi sa Banat News ni SFO2 Constancio Alcover Jr., misaysay kini nga ang nasunog nga poultry farm gipanag-iya ni Ruth Villa Climaco kinsa maoy mitawag sa ilang buhatan ug mipahibalong nasunog ang iyang negosyo.
Matud pa ni Alcover dako na kaayo ang kalayo apan nakontrolar nila kini sulod sa 15- minutos apan milanat pa og usa ka oras una nila hingpit napawong ang kalayo.
Gibanabanang mokabat sa P10 milyones ang kantidad sa danyos nga naglakip sa 90,000 ka mga pisong manok ang nangamatay sa maong sunog.
Nagduda usab si Alcover nga faulty electrical wiring maoy hinungdan sa maong sunog tungod kay ang manokan kinahanglan mang sug-an apan duna pay laing imbestigasyon nga himuon pagtino sa hinungdan niini.
Atol sa pagkahitabo dunay unom ka mga lalaking katabang sa maong poultry nga diha nangatulog tapad sa poultry farm apan wala nila mapugngi ang kapaspas sa pagkatap sa kalayo. – (BANAT NEWS)
Linkback:
https://tubagbohol.mikeligalig.com/index.php?topic=53292.0
