Tuesday, March 8, 2011
NAMATAY ang usa ka 9 anyos nga lalaki human mapaakan og iro usa ka bulan na ang nakalabay.
Gidala sa South Cotabato Provincial Hospital ang biktima nga nailhang si Renyan Tuan, nga taga Maan, T'boli, South Cotabato apan namatay gihapon.
Gisaysay sa amahan sa bata nga si Rene Tuan nga ang iyang anak gipaak og iro sa tuhod niadtong Pebrero 5 apan tungod kay gamay lang ang samad niini hinungdan nga wala na gitagad ug gihugasan lang gamit ang sabon.
Sulod sa usa ka bulan, wala matud pay nakitang simtomas sa bata tungod nag-eskuwela ug lagsik ang lawas niini.
Apan niadtong Dominggo, nakit-an na lang ang biktima nga nagbula ang baba ug mahadlok na og tubig ug kahayag.
Tungod niini, gitabangan ang pamilya madala ang bata ngadto sa balay tambalanan apan human makalabay ang usa ka oras, nakabsan siya sa kinabuhi.
Gikumpirma sa nag-atiman nga doktor sa SCPH sa bata nga rabies ang gikamatay sa biktima, sumala sa amahan sa 9 anyos nga si Rene.
Gipatik sa mantalaang SuperBalita Davao Marso 09, 2011.Linkback:
https://tubagbohol.mikeligalig.com/index.php?topic=38669.0
