Friday, August 26, 2011
PATAY ang 85 anyos nga lolo human maghikog sud sa iyang kwarto didto sa Matina, dakbayan sa Dabaw, alas 11:45 sa buntag niadtong Huwebes.
Ang biktima mao si Antonio Bamoya Pondoc, 85, minyo taga #21, Phase 2, SIR New Matina.
Sa imbestigasyon nga gilusad ni Police Officer 2 Harold Delima, nasuta nga ang biktima naghigot og electrical wire sa liog ug ang laing tumoy gihigot sa division wall sa kuwarto niini.
Nadiskubrehan sa apo sa biktima nga si Theresa, 21, nga nagbitay ang lawas sa iyang apuhan ug dali kining nangayo og tabang sa iyang uyoan nga si Leonardo Totong ug sa ig-agaw nga si Pondoc Accontic ug ilang gitabang ang tigulang.
Nanawag sila sa 911 ug dali usab nga miresponde ang Ambulance #65.
Sa dihang gihiling ang biktima sa sakop sa 911, nasayran nga wala na kini vital signs ug gideklara kining patay na.
Walay nakit-ang laing angol ang biktima, gawas sa "ligature marks" sa liog.
Nahibal-an usab gikan sa anak sa biktima nga si Wilma Pondoc nga nagsulay na og pakamatay ang iyang amahan niadtong tuig 2000 ug 2010.
Gipahiluna na karon ang patay'ng lawas sa biktima ngadto sa ilang balay didto sa Matina. (Blue Cordero)
Gipatik sa mantalaang SuperBalita Davao Agosto 27, 2011. Linkback:
https://tubagbohol.mikeligalig.com/index.php?topic=43171.0
