MikeLigalig.com

SuperBalita Davao
Ni Alger Dura
Friday, July 26, 2013


DAVAO CITY -- Upat ka mga batan-ong lalaki, duha kanila mga menor de edad, nag-akusang gitortyur sila sa militar didto sa Loreto, Agusan del Sur niadtong Hulyo 22, ning tuiga.

Ang maong hitabo maoy nakapaaghat sa mga biktima nga modangop sa Karapatan Southern Mindanao Region aron mahatagan og hustisya ang nahitabo kanila.

Sa gihimong press conference sa Karapatan kagahapon dinhi sa siyudad sa Davao, si Estrella Basilisco, inahan sa 16-anyos nga si Jay-Ar, nagsulti nga makaluluoy kaayo ang iyang anak nga gikustodiya na karon Department of Social Welfare and Development (DSWD) sa Agusan del Sur.

Suma niya nga daghan ang bun-og sa kalawasan sa biktima tungod kay gipasipad-an siya sa mga sakop sa Citizen Armed Forces Geographical Unit (Cafgu) ilawom sa 26th Infantry Battalion sa Philippine Army.

Nasayran nga kauban ni Jay-Ar nga gidakop ang laing menor
de edad nga si Arnel Tolentino, Roland Sanglid, 19; ug Rico Basilisco, 18, pulos nagpuyo sa Barangay Sabud, lungsod sa Loreto.

Si Roland Sanglid, laing biktima nga nakalingkawas sa militar, nagbutyag nga gipasakitan sila sa midakop kanila.

"Nasugatan namo ang Bagani (pangalan nila sa Cafgu sa lugar) ug ila ming gipanggapos sa pisi. Gipangbukbok mi nila," sulti ni Sanglid sa SuperBalita kagahapon.

Giingon nga si Jay-Ar gisumbag sa tiyan ug likod, gipasoan ang baba sa mga sundalo.

Mga biktima gipasinglan nga kauban sa mga rebeldeng New People's Army (NPA) nga mipatay kang Barangay Kauswagan Kapitan Ramon Diaganon niadtong Hulyo 21.

Si Estrella, sa laing bahin, nagbutyag nga way kamatuoran ang pasangil nga sakop sa rebeldeng grupo ang mga biktima tungod kay nananghid ang iyang anak nga moadto sa barangay aron magparehistro sa Comelec.

Nakalingkawas si Roland ug Rico tungod kay dunay nakapugong nga ilang kabanay, apan ang duha ka menor de edad gidala sa sundalo sa Loreto Municipal Police Office.

Si Lieutenant Colonel Jose Leonardo Gille, commander sa 16th Infantry Battalion, nagbutyag sa Sun.Star Davao SuperBalita dihang gitawgan kagahapon sa telepono nga walay kamatuoran ang report nga gikulata ang mga biktima.

"Ang nangyari kasi ni-request kami ni Mayor Dario Otaza na mag-conduct ng road security kasi i-transport ang cadaver ni Barangay Captain Dioganon na pinatay ng NPA last July 21. Pinaputukan ang aming sasakyan ng apat ka tao kaya hinabol sila at nahuli," sulti ni Gille.

"Nung makita sila ng mga tao, may nakapagsabi na kasama sila sa mga pumatay kaya binugbog ng mga kaanak ng kapitan," dugang sa opisyal.

Subay sa affidavit ni Corporal Manser Moradaez, platoon sergeant sa Cafgu Active Auxiliary sa 26th IB, siya nagbutyag nga gipabuthan ang ilang sakyanan sa upat ka mga suspek mao nga gipasaka nila ang kasong frustrated murder batok nila Arnel ug Jay-Ar nga pulos mga menor de edad.

Gibutyag ni Hanimay Suazo, secretary general sa Karapatan SMR, nga pulos bakak ang pasangil sa militar aron di malambigit sa kasong pagpanurtyor.

"Nagpasalamat ako sa Karapatan na mayroon silang ganun na report. Pero, hindi pa namin tinu-torelate ang aming mga sundalo na gawin ang paglabag sa karapatang pantao. And I will stick sa sarili naming investigation," pahayag ni Gille.