MikeLigalig.com

Lalaki patay human nakabangga og kabaw
http://bisayanews.com/
Updated September 18, 2014


PADAYON pa nga giimbestigahan sa kapolisan sa Claveria ang insidente nga nahitabo niadtong milabay nga adlaw diin patay ang usa ka lalaki ug duha ang angol human giingong nakabangga og kabaw ang gimaneho niini nga motorsiklo mga alas 10:45 sa Claveria Misamis Oriental.

Ang biktima nga patay naila nga si Ruben Cabelto, 38, minyo nga taga Poblacion, Claveria, Misamis Oriental.

Ang angkas naila nga si Jerome Miñano ug usa ka Marie Jenes diin nadala usab sa balay tambalanan.

Nasayran nga sa inisyal nga imbestigasyon sa kapolisan sa Claveria nga gipanguluhan ni Police Inspecto Roque Neri nga gikan ang maong mga biktima sa Villanueva paingon sa Claveria.

Apan sa paghidangat sa nahisgutang dapit giingong nakabangga kini og usa ka kabaw nga miangol sa duha ka biktima ug patay si Cabelto diin maoy nagmaneho sa nahisgutang motorsiklo.

Gibutyag pa niini nga ngitngit ang maong dapit mao nga posibleng wala mabantayi ni Cabelto nga adunay kabaw sa tunga sa dalan nga maoy hinungdan sa ilang pagka-aksidente.

Gibutyag pa nga dili man kayo guba ang motorsiklo nga gimaneho ni Cabelto apan tungod usab wala silay nakita nga mga helmet mao nga posible usab nga maoy hinungdan nga grabe nga samad ang naangkon sa biktima.

Nasayran nga nadala pa sa balay tambalanan ang biktima apan nakabsan kini sa hinulaman nga kinabuhi adlaw nga Martes mga alas 5:50 sa buntag human sa grabe nga naangkon mga samad ug bun-og sa kalawasan.

Hangtod karong panahona, padayon pa nga giimbestigahan sa kapolisan sa Claveria ang maong panghitabo ug nanawagan nga motaho gyud dayon sa ilang buhatan kon kinsa ang nanag-iya sa maong kabaw. (KCS)

Linkback: https://tubagbohol.mikeligalig.com/index.php?topic=79015.0