MikeLigalig.com

Ni Lesley Caminade-Vestil/EIM (Banat) Updated April 24, 2011 12:00 AM


CEBU, Philippines - Patay ang inahan samtang kritikal ang anak niini nga lalaki human gidunggab sa usa ka lalaki sa Punto Alaska-Mambaling pasado ala-una sa kaadlawon kagahapon.

Ang namatay mao si Mandiskisa Pilaknaya, Badjao ug molupyo sa maong lugar samtang ang anak niini nga samaran nailhan nga 17-anyos, samtang ang suspetsado nailhan usab nga si Aurelio Matildo, sa maong lugar.

Sa imbestigasyon sa kapolisan nasayran nga ang anak nga Paliknaya gikatahong pwerteng huboga ug nagpunay og panghasi sa mga silingan hinungdan nga giapas kini sa inahan. Apan imbes motahod gikatahong nagdumili kini sa pagkuyog pauli nga miresulta sa ilang pagtinubagay.

Pipila ka minutos kalit lang nga miduol kanila si Matildo ug sa walay igong hinungdan giduslak ang duha.

Tungod sa maong panghitabo ang amahan nga si Jaime dali nga miadto sa dapit ug gidali pagdala ang duruha sa Cebu City Medical Center apan ang inahan gideklarar nga dead on arrival human kini makaangkon og samad dinunggaban sa iyang walang bahin sa dughan. Samtang ang anak niini gipaubos sa operasyon human makaangkon og samad dinunggaban sa iyang liog ug tuong bahin sa iyang tiyan.

Gisubay na karun sa kapolisan ang hinungdan sa pagpanunggab ni Matildo sa inahan ug anak ug gipangita na karon. (BANAT NEWS)



Linkback: https://tubagbohol.mikeligalig.com/index.php?topic=40367.0

Unta baba ang gigamit pagbadlong dili kutsilyo...

Linkback: https://tubagbohol.mikeligalig.com/index.php?topic=40367.0

Oi, namatay man pud diay ang anak. Niay mas updated ug mas detalyado nga coverage sa maong balita...



Inahan, anak gipatay


INAHAN ug anak nga mga Badjao gidunggab patay sa ilang silingan pasado ala una kagahapon sa kaadlawon sa Sityo Puntod, Alaska, Barangay Mambaling, dakbayan sa Sugbo.

Ang inahan patay na nga niabot sa tambalanan tungod sa samad dinunggaban samtang ang anak namatay sulod sa operating room sa Cebu City Medical Center (CCMC).

Ang nangamatay giila sa kapulisan nga mao sila si Mandikisa Tilacnaya ug ang iyang anak nga si Johnrey Tilacnaya, alias Kaandong, 17. Ang inahan ug anak giingong nagpakilimos lang sa kadalanan sa siyudad sa Sugbo.

Ang suspek kinsa nakaeskapo human sa hitabo giila sa kapulisan nga mao si Aurelio Matildo, 23, usa ka kargador sa Carbon public market.

Matod nila ni SPO3 Rolando Manalili ug SPO1 Rene Cebes sa Mambaling police station nga nag-inom sila si Johnrey ug suspek, kauban sa ilang mga higala.

Apan kalit lang nagmaoy si Johnrey dihang nahubog na og maayo.

Gibadlong siya ni Matildo ug mga higala aron di makamugna og kasamok, apan wa kini mopatuo ug nasuko na hinuon.

Nipunit og bato ang biktima ug gibato ang suspek, kinsa naigo sa baba hinungdan nga nasamad.

Ang suspek nga nasuko, nakakuha og kutsilyo ug gidunggab ang biktima sa makadaghan nga mga higayon.

Dihang nasayod nga naapil sa kagubot ang iyang anak, si Mandikisa niabot sa dapit aron motabang sa iyang anak, apan gidunggab sab siya ni Matildo og apil.

Ang inahan ug anak gidala sa mga tawo sa CCMC, apan si Mandikisa gideklarar nga dead on arrival samtang si Johnrey namatay sa operating room samtang gitabang sa mga doktor.

Dugang nasayran sa kapulisan nga sa wa pa ang hitabo, si Mandikisa nibadlong nang daan sa iyang anak nga di mag-inom kay hayan nasayod na sa batasan sa iyang anak kon mahubog.

Iya kining gitawag nga papaulion sa ilang balay, apan wa mopatuo.

Ang kapolisan sa Mambaling nilusad og hot pursuit operation, apan wa na nila maabti pa ang suspek nga nilayas human sa hitabo.

Nahipos na lang sa kapolisan ang impormasyon nga samdan sa iyang baba ang suspek human kini maigo sa pagbato sa biktima.


Ni Joy F. Tumulak
Saturday, April 23, 2011
SuperBalita Cebu Abril 24, 2011.

Linkback: https://tubagbohol.mikeligalig.com/index.php?topic=40367.0