Ni Dennes R. Tabar
Tuesday, February 19, 2013
NASIKOP sa kapulisan sa dakbayan sa Mandaue niadtong Lunes sa gabii ang tulo ka mga bayut nga giingong namugaw sa ilang gipahigayong entrapment operation.
Ila usab nga naluwas ang lima ka mga babaye, duha kanila mga menor de edad.
Ang mga suspek gipang-ila nga sila si Ryan Mendoza, alyas Balot, 27, taga Bantayan sa Hari, Barangay Looc; Persebal Buicer, alyas Perla, taga sityo Paradise, Barangay Looc, 26; ug Glenn Solon, 20.
Ang tulo kasamtangang gitanggong sa Opao police station sa Mandaue City Police Office alang sa kasong human trafficking nga ipasaka batok kanila.
Si Solon, usa sa mga suspek, niingon nga wa nila gibugaw ang ilang mga kaubang babaye ngadto sa usa ka langyaw.
Siya niingon nga giimbetar sila sa langyaw alang sa usa ka party.
Dugang niya nga di sila mga bugaw ug dugay na nilang higala ang kauban nilang langyaw, kinsa usa ka police decoy.
Sila gipangsikop sa dihang manakay na unta sa sakyanan dala ang mga babaye nga giingong gibaligya og tag P5,000 matag usa.
Sa imbestigasyon sa kapulisan, nasayran nga aduna gyoy suway nga pagbugaw sa mga b***t sa mga babayeng menor de edad ngadto sa police decoy hinungdan nga ila kining gidakop.
Si Senior Supt. Petronelli Baldebrin, city director sa MCPO, niingon nga niadto pa silang miaging semana nakadawat og kasayuran gikan sa usa ka concerned citizen labot sa illegal nga kalihukan sa mga suspek diha sa may dalan AC Cortes.
Busa pasado alas 9 sa gabii niadtong Lunes ilang gipahigayon ang entrapment nga gipangulohan sa Women and Children Protection Desk (WCPD) nga gipangulohan ni Insp. Sheryl Bautista, uban sa Investigation and Detection Management Branch (IDMB) nga gipangulohan usab ni Senior Insp. Ramil Morpos ingon man sa Department of Social Welfare and Development (DSWD).
Paglabay sa pipila ka minutos, ang gigamit sa kapulisan nga decoy nakauban na sa mga gikatahapan dala ang lima ka mga babayeng ilang ibaligya.
Matod ni Baldebrin nga ang ilang gigamit nga police decoy mihangyo og siyam ka mga babaye alang sa usa ka bachelor’s party. Apan nibutyag ang mga suspek nga ang laing upat ka mga babaye nagpaingon pa.
Samtang kada usa gikasabotan nga hatagan og tag P5,000 matag usa. Ang police decoy mihatag na usab og P3,000 isip downpayment.
Iyang gipasalamatan ang ubang mga ahensya sa goÂberno nga nahimong malampuson ang ilang operation.
Linkback:
https://tubagbohol.mikeligalig.com/index.php?topic=68927.0
