MikeLigalig.com

Ni Brenda D. Batuto (Banat) Updated November 05, 2011 12:00 AM


CEBU, Philippines - Usa ka 2-anyos nga batang lalaki nga taga dakbayan sa Mandaue ang giingong namatay sa meningococcemia kagahapon sa hapon.

Sa report sa Balitang Bisdak base sa death certificate sa bata “septic shock” nga hinungdan niini   mao ang sakit nga meningococcemia ang gikamatyan sa bata.

Ang patay’ng lawas sa bata gi-cremate usab dayon sa iyang mga kabanay tungod sa kabalakang makatakod kini sa uban. Ang city health office sa Mandaue mipadala dayon og mga epidemiologists ngadto sa lugar sa gipuy-an sa bata aron mopahigayon og imbestigasyon ug pagpanglimpiyo.

Ang Mandaue Health Office mipatuman na og mga precautionary measures aron malikayan nga dunay laing matakboyan sa ubang mga kabanay sa biktima sa nahisgutang sakit pinaagi sa pagpainom og antibiotic nga “prophylaxis.”

Si Mandaue Health Officer, Dr. Edna Seno mipasusi na usab sa mga lugar nga gisuroyan sa bata sa wala pa kini masakit niadtong Nobiyembre 2, 2011.

Matud usab ni Seno nga ang bata na-admit sa usa ka tertiary nga tambalanan sa siyudad nga dunay kapasidad pag-atiman ug pagdeklarar nga meningococcemia ang sakit niini.

Hinuon duna pay gipahigayong blood culture aron matun-an ang maong kaso. Si Seno miingon nga mahimong makuha ang sakit pinaagi sa gininhawa sa natakbuyan niini.

Si Dr. Susana Madarieta, director sa Department of Health -7 nagkanayon nga ang meningococcemia motumaw kini matag karon ug unya ug ang kaso sa bata wala pa nila makumpirmar. Ang maong sakit ordinaryo ra sa pagsugod sama sa paghilanat, sakit sa tutunlan apan paspas ang pagkaluya sa pasyente ug kung di matabang mamatay kini. (EIM)  (BANATNEWS)



Linkback: https://tubagbohol.mikeligalig.com/index.php?topic=44117.0

Ni Brenda D. Batuto/EIM (Banat) Updated November 06, 2011 12:00 AM


CEBU, Philippines - Ang Central Visayas dunay tulo ngadto sa lima ka kasong matala sa sakit nga meningococcemia matag tuig sumala ni Dr. Susanna Madarieta, director sa Department of Health (DOH)-7.

Si Madarieta nga nahinabi sa Banat News nagkanayon nga ang uban sa maong kaso gidudahan lang o suspected apan ang uban kompirmado gyud.

Apan dili kini angayang ikaalarma tungod kay duna dayon silay ipadalang mga health workers nga moimbestigar ug mopainom og prophylaxis antibiotics sa mga tawo diha sa lugar. Ang prophylaxis usa kini ka antibiotic nga maoy panagang sa meningococcemia. Kini imnon usab sa mga health workers sa dili pa moadto sa lugar diin adunay gidudahang nasakit og meningococcemia.

Hinuon niining tuiga, usa pa lang ka kaso sa dakbayan sa Mandaue nga meningococcemia bahin sa namatay nga 2-anyos nga batang lalaki sa milabay’ng adlaw apan ila pa gihapon kining giimbestigar.

Usa sa mga pamaagi sa pagkompirmar sa maong sakit mao ang pag-blood culture sa dugo sa pasyente ug karon ilaha pang gipaabot ang resulta.

Matud ni Madarieta nga ang meningococcemia usa ka “airborne” o ang kagaw niini madala sa hangin ug delikadong mahanggab maong gikunsiderar kining “infectious disease.”

Ang meningococcemia usa ka “fatal” o makamatay nga sakit tungod kay dali kaayong mokuyanap ang kagaw niini sa lawas apan kung matabang dayon o madali ang pasyente sa pagtambal maayo usab kini.

Ang meningococcemia motakboy ni bisan kinsa apan kasagaran sa matakboyan mao ang mga bata tungod kay hinay pa ilang mga resistensiya ug kasagaran sa mga bata dili malikayan magduwa-duwa kini sa hugaw o dili limpiyo.

Si Madarieta midugang nga ang bation sa dunay meningococcemia susama lang sa ordinaryong hilanat nga adunay mga rashes (libagha) sa panit sa pasyente. (BANATNEWS)



Linkback: https://tubagbohol.mikeligalig.com/index.php?topic=44117.0