Ni Guam P. Logroño
MANAGER sa usa ka banko ug duha ka mga kawani ingon man walo ka mga magtutudlo ang giingong naÂngailad sa ilang pagpalit og computer tablets niadtong Miyerkules sa buntag.
Giingong gipatuo nga branded nga computer tablets ang gipamaligya ngadto kanila, apan ilang nasuta nga ang marka sa brand name pinintal ra diay ug giingong gubaon pa ang mga unit.
Ang mga biktima giilang sila si Jowelyn Maano, 32, minyo, taga Barangay Owak, lungsod sa Asturias, (OIC) manager sa RCBC Bank sa Poblacion, Balamban ug mga staff nga sila si Maria Rizame Cano, 21, dalaga, taga Barangay Magdugo, dakbayan sa Toledo ug si Maryjoy Young, 33, dalaga, taga dakbayan sa Sugbo.
Samtang ang walo ka mga magtutudlo sa Little Angels Montessori School nga nahimutang sa Barangay Sta Cruz, Balamban giilang sila si Jenifer Montebon, 33, minyo, taga Poblacion, Asturias; Grace Genterone, taga Barangay Pondol, Balamban; Lovella Melgar, dalaga, taga Barangay Pondol; Robelyn Calo, taga Barangay Poblacion; Ritchie Jun Ricafort, ulitawo, taga Barangay Prenza, Balamban; Christine Sotes, dalaga, taga Barangay Prenza; Jervy Benoya, taga Barangay Poblacion Balamban; ug Raul Rallos, taga Barangay Poblacion, Asturias.
Si SPO3 Arvie Banate, imbestigador sa Balamban Police nga nahinabi sa Sun.Star Superbalita nagkanayon nga ang tulo ka mga kawani sa banko nakuhaan sa ilang P12,600 cash human nipalit sa duha ka mga computer tablet nga dunay pakapin nga usa.
Samtang ang mga magtutudlo naka-isyu og tseke nga mokantidad sa P50,400 alang sa walo ka units nga ilang napalit.
Ang duha ka mga suspek giila nga sila si Estelito Villa, taga Fatima Village Tacloban City; ug si Butch Casilao, taga Silay City, Negros Occidental.
Nagbilin sila og mga identification (ID) card sa ilang pagsulod sa banko isip policy kay mo-encash sa laing mga tseke nga ilang nadawat.
Si Banate niingon nga niadtong Huwebes sa alas 6 sa gabii, ang mga kawani sa banko ni-report sa insidente diin nag-abot sila sa mga magtutudlo nga susamag problima.
Si Maano nitug-an nga naaghat sila sa pagpalit sa computer tablets dihang nadala sa maayong pagdiskarte ni Villa.
Giingong mga alas 10 sa buntag niadtong Miyerkulis ning-abot ang duha sa banko aron magpa-encash sa P80,000 nga tseke gikan sa ilang mga kustomer sa usa ka vocational school sa Balamban.
Tungod niini, ilang nahisgutan ang baligyang computer tablets nga gi-offer sa mga suspek ngadto kanila nga barato itandi sa presyo sa tindahan nga P25,000 matag usa.
Ang matag unit gisulod sab og sudlanan nga sama sa original, diin ang likod dunay nakabutang nga brand name (ngan gipugngan) apan dihang nabulabog nasuta nga giayo lang kini sa pagpintal.
Si Maano niingon nga dihang nakabantay siya nga dunay deperensiya ang iyang unit, iya unta kining iuli apan si Villa, kinsa mi-demonstrate sa produkto niingon nga di sila makahatag sa gusto niini kay nakaisyu na sila og resibo.
Gipasaligan niini si Maano nga kon dunay nakit-ang derensiya sa units ilang ilisan, ingon man mobalik sila human sab nila makuha ang cash nga bayad sa mga kawani sa usa ka dakong kompaniya sa Balamaban nga mi-order.
Apan pagka-Huwebes, nagduda gyud si Maano uban sa iyang duha ka mga staff nga sila nangailad kay ang ilang mga unit pulos di mo-function ug way signal mao nga di na nila magamit hinungdan nga ni-report sila sa kapulisan.
Samtang si Montebon, natayming sab niadtong Miyerkules sa buntag nga dunay gi-transact sa banko hinungdan nga naingganyo sab siya ug niadto sa ilang tunghaan pagka-alas 11:00 sa buntag ang mga suspek.
Gitug-an sa mga maestra nga nagyawat sab sila kay barato ang offer.
“Maayo kaayo mo-esplikar si Villa. Nadala silang tanan. Ang gi-demo ani kadtong tinuod man pero ang gipangbaligya mapalit ra man sa tindahan sa Colon. Tag libo kapin,†sumala pa ni Banate.
Gipadayag niya nga maora gyud og tinuod ang computer tablets kay gibutangan sab og itom nga sudlanan ingon man ang ngalan niini, apan pintal ra diay diha sa likod nga makiskis.
Ilang nasubay ang duha ka mga suspek nga nagdala og sakyanan nga L-300 van kolor blue nga may plaka TPF-867.
Nasubay sa banko sa LTO-7 nga gipanag-iya kini ni Estelito Villa, kinsa ang ngalan niini mao sab ang nakabutang sa logbook sa banko dihang gibilin ang driver’s license dihang mipahigayog demo. Kasong swindling (at-large) ang ilang giandam nga ipasaka batok sa duha ka mga suspek nga gituohang mga sakop sa sindikato.
Gipatik sa mantalaang SuperBalita Cebu Septembre 22, 2012.
Linkback:
https://tubagbohol.mikeligalig.com/index.php?topic=54938.0
