Ni Stephanie Viovicente-Berganio
Tuesday, November 29, 2011
USA ka 15 anyos ang giingong gitabangan og lugos sa mokabat tulo ka mga lalaki niadtong Domingo mga alas 7:30 sa gabii sa lungsod sa Lagonglong, Misamis Oriental.
Giila ang biktima nga mao si Leslie (tinuod nga pangalan ug apelyido gipugngan), residente sa susamang dapit.
Gidala sa Northern Mindanao Medical Center (NMMC) ning siyudad sa Cagayan de Oro ang biktima human nakaangkon og grabeng bun-og sa lawas.
Ang apuhan niini nisaysay nga iyang gisugo ang iyang apo og papalit sa bugas dihang pag-abot sa tindahan nakita ang iyang higala nga babae nga adunay kainom nga tulo ka mga lalaki niadtong tungora hinungdan nga giduolan kini.
Gihanggat og inom ang biktima hinungdan nga mirespetar usab ug niinom sa usa ka shot. Ang tulo ka mga lalaki nagsige og panagatawa dihang miinom na si Leslie.
Natingala na lamang pag-ayo si Leslie tungod kay kalit lang siya nga nalipong hinungdan nga iyang gipangutana ang tulo unsay gisagol sa ilimnon apan nitubag nga gisagulan kini og vetsin. Wala na lamang kaayo gitagad sa biktima sa pagtuong tripping lamang.
Human sa pag-inom, mikuyog ang biktima sa higalang babae uban sa tulo ka mga lalaki didto paingon sa buwangan apan mibiya ang higalang babaye ug miingon nga mobalik lamang kini.
Nabiyaan ang biktima ug ang tulo ka mga batan-on lalaki ug nakurat na lamang dihang gipugos ang biktima sa pagpahubo ug nagmalampuson sa ilang tinguha.
Tungod sa kabalaka sa apuhan nga wala kini nakauli gipangita kini ug adunay nakasulti nga anaa sa buwangan ug nakita mismo sa apuhan ang gihimo sa mga lalaki sa biktima ug nagsig-iya sa pagpangdagan human namatikdan ang iyang presensya. Nasayran sa apuhan ang nahitabo human kini giasoy usab sa biktima.
Padayon pa nga gipangita sa kapolisan sa Lagonglong Police Station ang mga suspetsado nga dili pa mahatag ang mga pangalan ning panahona.
Ang biktima ubos pa sa obserbasyon sa mga doktor ug gihulat ang resulta kung gilugos ba gyod kini apan gipamugos sa biktima nga aduna gyod nahitabo kaniya. --
Gipatik sa mantalaang SuperBalita Cagayan de Oro Nobiembre 29, 2011. Linkback:
https://tubagbohol.mikeligalig.com/index.php?topic=44460.0
