Ni Bong Soriano/EIM (Banat) Updated August 12, 2011 12:00 AM
CEBU, Philippines - Gumikan sa kahubog sa usa ka 15- anyos nga dalagita gilugos sa iyang duha ka higalang lalaking iyang gikainom diha sa usa sa mga sitio sa barangay Looc dakbayan sa Mandaue sa milabay’ng kaadlawon.
Uban sa inahan, midangop ang 15-anyos sa kapolisan sa Station 5 ug mitug-an nga siya giamong-amongan sa iyang duha ka higalang nagpangidaron og 21 ug 26-anyos (mga pangalan gipugngan aron di mailhan ang biktima) residente sa maong dapit.
Matud pa ni Anna (di tinuod pangalan) giimbitar siya sa duha nga mag-inom ug tungod sa ilang kasuod wala siya mobalibad.
Miabot sa mga ala 1:00 sa kaadlawon ang ilang panag-inom maong nahubog siya ug mihangyo nga adto matulog sa lawak sa higalang babaye.
Nakugang nalang si Anna sa dihang nakamata kini nga nagpatong na ang usa kanila ug milampos sa pagpahimulos kaniya ug dihang nahuman mibanos na usab ang usa paglugos kaniya.
Tungod sa kalapoy sa iyang lawas wala siya’y nahimo pagpakgang kanila, apan dihang nakauli misumbong siya sa iyang inahan kinsa mikuyog kaniya pag-adto sa polis.
Ang duha nasikop atol sa gihimong hot pursuit operation ug gikatakdang pasakaan og kaso. (BANAT NEWS)
Linkback:
https://tubagbohol.mikeligalig.com/index.php?topic=42868.0
