Ni Jonathan F. Tumulak
Tuesday, May 3, 2011
LAIN na sab nga bata ang nagpakamatay nga may kalabutan gihapon sa pagtungha.
Sa miaging buwan, usa ka batang tinun-an sa Minglanilla naghikog tungod sa iyang gagmay nga grado nga wa gikauyon sa ginikanan.
Niadtong Lunes sab sa udto, usa ka bata nga babaye tinun-an nga wa kauyon sa tunghaan diin siya gipa-enroll sa iyang inahan, naghikog.
Giatol ang pagpakamatay sa besperas sa iyang ika-13 anyos nga adlaw nga natawhan nga iya untang saulogon kagahapon.
Tinuod nga ngan sa bata gipugngan tungod sa hangyo sa kapulisan.
Ang nagbitay nga lawas ni Mike nadiskubrehan sa ilang silingan pasado alas 12 sa miaging udto sa sityo Mansanitas, Cogon Pardo, dakbayan sa Sugbo.
Sa pasiuna nga imbestigasyon nga gihimo nila ni SPO4 Alex Dacua, PO2 Edario Manatad, PO2 Jodan Batucan ug PO2 Michael Cudaste sa Homicide Section, nagbutyag nga niuban ang biktima sa iyang inahan nga si Abeth nga nagpa-enrol sa public high school nianang buntag.
Nahibulong na lang ang inahan nga kalit lang nga nawala ang iyang anak ug wa na gyud mobalik.
Sa pagpauli sa inahan nianang udto, diha na niya masayri nga nagpakamatay kini ginamit ang pisi nga gihigot diha sa iyang liog.
Dugang nasayran sa kapulisan nga usa ka silingan ang unang nakadiskubre sa biktima nga nagbitay sulod sa ilang balay sa dihang nadunggan niini nga dunay nilagubo sa ilang balay.
Gisuwayan pa sa pagdala ang biktima sa Cebu City Medical Center (CCMC), apan paglabay sa 15 minutos, nakabsan kini sa iyang kinabuhi.
Usa ka suicide note ang gibilin diha sa tiilan nga iyang gibitayan.
Sa maong suwat, gipadayag sa biktima ang iyang pagmahay sa iyang ginikanan tungod kay kanunay siyang itandi sa lain niyang igsuon nga dagko og grado sa tunghaan.
Gipadayag usab sa biktima ang iyang gibati nga pagmahay human kanunay siya makadungog nga siya bugo ug dako og kalainan sa pangutok sa iyang igsuon.
Nisamot ang iyang pagmahay human siya gipa-enrol sa usa ka public school kay gusto niya ang lain na usab nga tunghaan, apan wa tugoti sa iyang ginikanan tungod sa kalisod sa kahimtang pinansyal.
Sa miaging buwan, usa ka 13-anyos nga tinun-ang lalake sa 1st year high school naghikog usab human nahiubos nga gikasab-an sa iyang inahan tungod sa gamay nga average sa iyang grado sa pagtungha.
Gipatik sa mantalaang SuperBalita Cebu Mayo 04, 2011. Linkback:
https://tubagbohol.mikeligalig.com/index.php?topic=40499.0
