Sunday, May 1, 2011
TUNGOD sa pan, usa ka 13-anyos nga batang babaye gilugos sa usa ka mag-uumang ex-convict niadtong Sabado sa hapon sa Sitio Tugas, Barangay Marmol, lungsod sa Tuburan.
Si Anna (di tinuod nga pangan) ang nawad-an sa iyang panimuot human nikaon sa pan nga gihatag sa suspek nga si Rafael Obas, 57, mag-uuma, ex-convict, lumad nga taga Lutopan, dakbayan sa Toledo ug kasamtangang nagpuyo sa Barangay Marmol.
Si SPO3 Jose Relampagos, desk officer sa Tuburan police nagkanayon ang konsehal sa barangay nga si Letecia Capalac, iyaan sa biktima, nanawag og pulis niadtong Sabado sa hapon.
Nipahibalo nga ang iyang pag-umangkon gilugos sa ilang silingang mag-uuma kinsa nadakpan sa mga barangay tanod, mga residente, ug kabanay sa biktima.
Ang hepe sa Tuburan nga si Insp. Welther Grapa, mga kauban daling ningrespondi ug pag-abot sa lugar, gi-turnover ang suspek sa tanod nga sila si Felix Capalac ug Junito Capalac, uyoan sa biktima.
Si SPO3 Relampagos niingon nga mga ala una sa hapon niadtong Sabado, ang biktima giagni sa suspek nga moadto sa ilang panimalay sanglit duna kiniy ihatag.
Ang biktima kinsa nagtahod sa suspek nga motawag pa gani niini og “Lolo†tungod kay suod sa iyang pamilya ug maoy nagdala diha sa ilang lugar aron mag-uma, nikuyog usab gilayon.
Ang biktima nitug-an nga dihang naabot sila sa panimalay sa suspek gihatagan siya niini sa pan, apan sa iyang pagkaon kalit lang siyang nawad-an sa panimuot.
“Nawad-an daw siyag panimuot human nikaon sa pan murag dunay gibutang nga klase sa kimekal aron makatulog ang bata… nakamatngon nalang siyag panimuot dihang gipaak ang iyang kiting sa iyang uyo-ang si Rodulfo Laurel,†sumala ni SPO3 Relampagos.
Giingong si Laurel, maoy nakadiskubre sa niluog nga krimen human nakabantay nga gidala sa suspek ang bata sa sud sa panimalay.
Natingala si Laurel, dihang didto na sa sulod sa panimalay ang iyang pag-umangkon, ang suspek kalit lang nanirado sa pultahan ug bintana sa balay.
Didto nagduda siya nga dunay di maayong buhaton ang suspek hinungdan nga iyang giduol ang panimalay ug gisusi.
Sa paglili niya, maoy iyang nakit-an nga ang bata wa nay panimuot nga hubo ang lawas ug ang suspek nanghilabot niini.
Tungod sa iyang kahadlok, wa gilayon siya makapakgang kay kini usa ka ex-convict, apan nabantayan siya niini diha sa gawas hinungdan nga nikaratel siya’g dagan nipahibalo sa ginikanan sa iyang pag-umangkon ug mga silingan.
Ang biktima naluwas didto sa sulod sa panimalay sa suspek ug gitabang aron maulian sa panimuot.
Ang mga paryente, barangay tanod, ug mga silingan ang daling nagtibangay sa pagpangita sa suspek.
Apan wa kini makasibat ug layo tungod sa kadaghang nangita niini hinungdan nga nadakpan gyud ug gibalhog sa karsel sa kapulisan samtang gikatakdang ipasaka ang kasong pagpanglugos karong adlawa ingon man kalapasan sa RA.7610.
Matud ni SPO2 Relampagos, nga positibong nahilabtan ang biktima dihang gipahiling sa doktor.
Dugang niya nga ang suspek suod sa pamilya sa biktima kay mao kini nagda kanila sa Tuburan aron mag-uma ug taudtaod na kining nakapuyo sa dapit sukad nibiya sa Toledo.
Ang suspek nabilanggo niadto sa kasong pagpatay.
Gipatik sa mantalaang SuperBalita Cebu Mayo 02, 2011. Linkback:
https://tubagbohol.mikeligalig.com/index.php?topic=40466.0
