Ni Sanden J. Anadia (Banat) Updated October 20, 2012 12:00 AM
CEBU, Philippines - Kapin sa 100 ka kilong karne sa kabayo ang gisakmit sa mga tinugyanan sa Department of Veterinary Medicine and Fisheries (DVMF) kagahapon sa buntag diha sa dalan Salvador sa Barangay Labangon niining dakbayan sa Sugbo. Base sa gihimong inspeksyon sa DVMF ilaha nga nasuta nga double dead kini nga karne ug peligrong makaon sa tawo ug wala kini mag-agi sa beterinaryo maong wala kini meat inspection certificate.
Gawas pa niini dili usab tukma ang sakyanan ang gikargahan sa karne imbes nga refrigerated o ba kaha closed-type nga sakyanan. Matud pa sa head sa DVMF nga si Dr. Alice Utlang nga lapad ang gibuhat nila karon nga operasyon sa paggukod sa mga double dead nga karne.
Nagduda si Utlang nga double-dead ang maong karne tungod kay duna pa kini mga dugo sa karne timailhang wala kini matarong pagpadugo dihang giihaw nga sagad mahitabo sa himalatyong hayop nga luya ang lawas.
Ang baskog nga hayop kun ihawon mahutdan gyud og dugo sa mismong karne tungod sa pagpangusog niini samtang giihaw apan ang masakitong hayop dili na kapareho kakusgan sa himsog nga hayop. Sumala pa niya nga duna sila’y gi-require nga sakyanan nga kargahan gyud sa karne diin usa na niini nga dili ma-expose sa abog ang gikarga nga karne aron dili kini makontaminado. Panawagan ni Utlang ngadto sa publiko nga kinahanglan nga mopalit og karne adto lang sa mga lehitimong tindahan aron dili mabutang sa peligro ang ilang panglawas.
Gisaysay ni Utlang nga aron masigurong luwas ang karne, ang kustomer mahimong motan-aw sa meat inspection certificate sa tag-iya sa karne. Ang mga nangasakmit nga karne gidonar didto sa Cebu City Zoo. (BANAT NEWS)
Linkback:
https://tubagbohol.mikeligalig.com/index.php?topic=55973.0
