Tuesday, July 1, 2008
Patay ang 24 anyos nga babaye ug ang kapin sa tuig pa lang nga anak niini sa dihang gisulod sa ilang balay ug gituohang gilugos una pa gipatay sa wala pa mailhing mga tawo didto sa bukirang bahin sa barangay Lingigon lungsod sa Argao niadtong Domingo sa gabii.
Ang mga biktima nga gituohang gipatay pinaagi sa pagtigbas og atsa giila sa kapolisan nga si Jocelyn Rubia Gomez, 24, minyo ug ang usa ka tuig ug napulo ka bulan nga anak niini nga si Riza.
Samtang wala diha sa ilang pinuy-anan ang bana niini nga si Roel Gomez tungod kay nanarbaho kini isip kargador sa Carbon ning dakbayan sa Sugbu.
Matud ni SPO1 Arnold Abenir, imbestigador sa Argao Police Station sa dihang nahinabi sa Banat News subay sa inisyal nga imbestigasyon niini alas 5 pasado kagahapon sa buntag nahibaw-an ang krimen sa dihang mipauli ang bana niini.
Matud pa pag-abot sa bana niini nanuktok kini sulod sa duha ka higayon apan wala gyud moabli ang iyang asawa ug sa dihang iyang gisusi namatikdan niini nga naguba na ang pultahan hinungdan nga nangayo dayon siya og tabang sa iyang amahan nga si Alejandro nga nagpuyo dili layo.
Sa dihang ilang gisusi nakit-an niini ang patay’ng lawas sa iyang asawa nga naghigda na sa katre nga dunay unom ka samad tinigbasan sa nawong ug samtang ang kapin sa tuig niining anak didto na makit-i nga patay na 20 metros ang gilay-on gawas sa ilang balay.
Matud ni SPO1 Abenir naka-recover sila og atsa nga nagkadugo nga gibutang ilawom sa katre nga maoy gituohan nga gigamit sa mamumuno pagpatay sa biktima.
Gidudahan sa kapolisan nga gilugos una ang biktima sa wala pa kini patya subay sa gitug-an niini ngadto sa iyang amahan nga si Alejandro nga dunay lalaki nga mamugos nga mosulod sa ila ug anha matulog, pipila ka adlaw na ang milabay.
Gitug-an usab sa mga silingan nga nakabati sila og tingog nga nangayo og pakitabang mga alas 10 sa gabii niadtong Domingo apan wala nila kini panumbalinga tungod kay naandan man usab nga kanunay nga dunay managlalis ug mag-away sa maong lugar.
Linkback:
https://tubagbohol.mikeligalig.com/index.php?topic=13649.0