Una ug Kataposan

[pioneer]

Una ug Kataposan
sinulat ni Mike Ortega Ligalig


ang siga sa flashlight nga imong gibitbit
dili makapalong sa paghot sa mga iro -
sila nahibolong ning daklit ko nga pag-abot,
ug imong gipangayo ang akong pagsabot
sa kalanrakas sa mga mananap nga buot
mohasmag sa kangitngit aron pangitaon
ang akong anino nga nagsunod sa kahayag
sa imong kaanyag.

gisud-ong ko ang imong bayhon
nga nagkahanap samtang mitadlas sa kangitngit
paingon sa pultahan sa inyong balay
ug gihulaman ko ang kahayag sa bulan ug bituon
aron idan-ag sa naamang kong mga mata...

mobalik ako sa dalan nga atong gisubay
diin ang duha nato ka kasing-kasing
nangita sa mga eskina sa kalangitan
nga karon gidag-oman sa bag-ong kahimatngon

kini ang una ug kataposan nga higayon
nga madungog ko ang paghot sa mga iro,
makita ang imong panagway nga gikulit
sa mga damgo, mahikap ang kahumot
sa imong tingog, masimhot ang pinitik
sa atong mga dughan -
ug mobalik ako nga mag-inusara
paingon ngadto sa dalan nga mamingaw
maghandum sa mga gutlo nga nahanaw