Balita nga makapahinuklog: Bana nga gibiyaan sa asawa, naghikog

[hubag bohol]

GENERAL SANTOS CITY -- Gihingusgan karon sa Tinagcan Police Station nga walay foul play sa kamatayon sa usa ka bana nga naghikog niadtong Martes didto sa Barangay Katangawan ning siyudad.

Giila ang biktima nga si Dionesio Diantan, 27, minyo, molupyo sa Barangay Kihan, Malapatan, Sarangani.

Sa imbestigasyon sa Tinagacan police, nasayran nga nakaplagan na lang nga nagbitay si Diantan sa balay sa iyang agalon didto sa Purok 5, Barangay Katangawan.

Nakuha sa kiliran sa biktima ang suicide letter nga nagkanayon nga nahimo niini ang pagkutlo sa iyang kaugalingong kinabuhi tungod sa pagbulag kaniya sa iyang kapuyo nga giilang si Sherlita Manangka, tulo ka bulan na ang nakalabay gumikan kay mikuyog sa laing lalaki.

Matud pa sa pipila ka mga nakakita sa biktima nga ulahi nilang nakit-an si Diantan niadtong Lunes sa gabii nga luya ug naghilak sa suok sa panimalay sa iyang agalon sa Katangawan apan pagka-ugma, nakit-an na lamang nga patay na siya. (Emir C. Bariquit)


Gipatik sa mantalaang SuperBalita Davao Septembre 18, 2015.