Enero 1 KALAN-ON SA TIBUOK TUIG
BASAHA: Jeremias 15:15-21
Gipatalinghogan ko ang tanang gisulti mo kanako. . . imo ako, busa ang imong pulong makahatag kanakog kalipay. -Jeremias 15:16
Naanad akong mokaon ug gisantis kay magluto man niini ang akong inahan matag Bag-ong Tuig. Bisag wala tuod siya motuo sa tinuohan sa pipila nga swertihon ang magluto ug gisantis sa Bag-ong Tuig, kini nahimong tradisyon na diha sa among panimalay.
Daghanang katawhan ang mosugat sa bag-ong tuig pinaagi sa pag-andam ug repolyo, isda, dugos, sardinas, o asin. Ang mga Hapon mokaon ug miki. Ang mga Griego magluto ug espesyal nga pan. Sa Espanya, nabatasan na ang pagkaon sa 12 ka buok nga ubas samtang gihulat ang pila ka segundo sa sumusulod nga tuig. Ang mga antropologo nagpadayag nga ang pag-tuo nga may mga pinasahing putahe nga magdalag swerte nagsugod didto sa karaang Babilonia.
Wala hulata ni propeta Jeremias ang iyang swerte. Ingon nga tigpamaba sa Dios sa malisod nga yugto sa kasaysayan sa Israel, giantos niya ang pagsalikway ug paglutos. Bisan pa niini, nakaplagan niya ang kahumpayan diha sa Pulong sa Dios. Sa walay pagduhaduha iyang giingnan ang Dios, “Gipatalinghogan ko ang tanang gisulti mo kanako...imo ako, busa ang imong mga pulong nakahatag kanakog kalipay” (Jer. 15:16).
Ang pagkaon ug gisantis sa Bag-ong Tuig dili makapaayo sa dagan sa akong kinabuhi sa taliabot nga tuig. Apan dako ug ikatabang ang Pulong sa Dios kanako kon kini himoon kong kabahin sa akong kinabuhi pinaagi sa pagbasa, pagtuon, ug pagsag-ulo niini sa matag adlaw. Ang Biblia mao
ang kalan-on sa atong kalag ug kini ang mopalagsik kanato sa pag-atubang ta sa bag-ong tuig. -DCM
Biblia ko, sa matag adlaw basahon,
Ug pamalandongan sa kagabhion;
Molipay kanako sa walay puas,
Gimanggad ko sa tanang panahon. -Watts
ANG BIBLIA KALAN-ON SA MATAG ADLAW, WALA KINI GITAGANA SA PINASAHING OKASYON LAMANG.
* * * * * * *
Avail of easy and fast online loan at
www.tala.com Philippines
Linkback:
https://tubagbohol.mikeligalig.com/index.php?topic=122230.0
