Ni Sheila C. Gravinez
Saturday, February 18, 2012
OPISYAL na nga gipahibawo ni Pope Benedict XVI kagahapon ang canonization alang sa pagbayaw ni Beato Pedro Calungsod isip bag-ong santos atol sa gipahigayon nga consistory sa mga Cardinal sa tibuok kalibutan sa Saint Peter’s Basilica sa Vatican City.
Ang canonization sa Visayan martyr ug katekista gitakda sa Oktubre 21 niining tuiga.
Tungod niini, duna na unya’y ikaduha nga santos ang Pilipinas sunod ni Saint Lorenzo Ruiz, kinsa na-canonized ni anhing Pope John Paul II sa Vatican niadtong Oktubre 18, 1987.
Matod ni Msgr. Esteban Binghay, episcopal vicar sa Artsidyosesis sa Sugbo nga nagbunga gyud ang paningkamot ni Cebu Archbishop Emeritus Ricardo Cardinal Vidal ug tanang sakop sa artsidyosesis nga mahimong Santos si Calungsod ug maila ang iyang nahimong kaayohan sa Simbahang Katoliko.
“Thanks be to God! Wa mausik ang atong gihimong paningkamot. Ang atong kahago sa pagpreparar gitugot gyud sa Ginuo ug ni Beato Pedro Calungsod mismo,†pahayag ni Binghay sa pakighinabi sa Sun.Star Superbalita kagahapon.
Si Cardinal Vidal usa sa mga mitambong sa consistory sa St. Peter’s Basilica kagahapon diin ang Santo Papa nitudlo og 22 ka bag-ong mga Cardinal.
Niadtong Disyembre 19, 2011, giaprobahan sa Vatican ang promulgation of decrees for canonization sa mga milagro ni Calungsod ug sa laing unom pa ka mga kandidato sa pagka Santos sa Simbahang Katoliko.
Ang labing bug-at nga milagro nga nahimo sa Bisaya nga martyr nahitabo sa usa ka babaye nga lumad nga taga Leyte niadtong 2002, diin gi-pronounced siya nga clinically dead sa mga doctor duha ka oras human siya giatake sa sakit sa kasingkasing apan nabuhi human ang usa ka doktor nag-ampo alang sa iyang kaayohan pinaagi sa panabang ni Calungsod.
Human gianunsyo ang canonization sa Visayan martyr, sunod himuon sa Simbahang Katoliko matod ni Binghay mao ang pagpasabot sa katawhan sa espirituhanon ug formational nga kinabuhi ni Calungsod labi na sa pagka katekista niini, ug pag-organisa og mga pilgrims nga motambong sa canonization rites sa Roma ug ang Thanksgiving Mass nga himuon sa dakbayan sa Sugbo human sa canonization.
Si Binghay nidugang nga dunay lima ka bahin sa programa apil na ang aktibidad nga may kalambigitan sa pre-announcement phase, post announcement, pre-canonization rites, ang canonization rites sa Roma ug ang post-canonization phase sa usa ka National Thanksgiving Mass nga himuon sa dakong luna sa South Road Properties.
Ang Simbahang Katoliko sa Sugbo nagtinguha nga makahipos og labing minos P50-P60 milyones alang sa selebrasyon ug canonization ni Calungsod.
Si Binghay niingon sa maong kantidad, P30-P35 milÂyones gastuon para sa canonization nga himuon didto sa Roma samtang ang nahibilin nga P25-P30 milyones gastuon para sa thanksgiving dinhi sa Sugbo.
Siya nidugang nga sa mosunod nga mga buwan himuon usab ang cathechetical conferences ni Calungsod didto sa Roma ug sa Sugbo.
Gipatik sa mantalaang SuperBalita Cebu Pebrero 19, 2012.
Linkback:
https://tubagbohol.mikeligalig.com/index.php?topic=47532.0
