Friday, April 20, 2012
HUGOT nga mireklamo ang mag-uyab human ang babaye nakakaon og ok-ok sa giorder nga pagkaon sa usa ka kan-anan sa food court sa Gaisano Mall nga nahimutang sa dalan Corrales Extension CM Recto ning siyudad sa Cagayan de Oro.
Ang mag-uyab nga mao sila si Venus Olivar ug Mark Gregor Tropel, taga Macalaban ning siyudad ang nangaon niadtong tungora sa food court sa maong mall ug nagpili og sud-an sa usa ka kan-anan nilabayng mga adlaw.
Samtang nagkaon ang duha ka mga biktima nakurat pag-ayo si Venus dihang nakita ang ok-ok sa iyang plato nga naapil pagluto sa sud-an.
Si Gregor nga nainterbyu sa Sun.Star SuperBalita ug personal nga mipatabang sa buhatan niingon nga ila dayon nga gireklamo ang maong insidente sa tigdumala niini apan giingong bayaran lang sila og usab sa ilang nagasto.
“Dili ko gusto in-ana kay trauma man to para sa amoa, wala man nag count ang kwarta ang importante wala man silay sakto nga sanitation, miangkon pa gyod sila nga dili lang kami ang nireklamo niini†matud ni Gregor. Kinsa nipasabot nga posibleng daghan pa sila ang susamang kasinatian niini.
Gani gibutyag ni Gregor nga kanunay sila nga magkan-anan sa Imperial Palace apan ang uwahing insidente maoy napakurat kanila.
Sa iyang bahin ni Gabby Bacarro kinsa Gaisano Mall Manager nibutyag sa Sun.Star Cagayan de Oro nga giaksyunan na nila ang insidente ug gain napulo sa iyang mga empliyado nga nadestino sa food court gi-terminate tungod niini.
Giklaro niini nga dili intensyon nga mabutang sa sud-an ang maong ok-ok mao nga ilang giimbestigahan nganong adunay nakabutang niini.
Gibutyag niini nga andam silang mohulat kung mopasaka gyod og kaso ang mag-uyab.
Si konsehal Dante Pajo kinsa chairman committee sa Sanitation and Health sa konseho sa siyudad niingon nga kinahanglan usa mohimo og written complaint ang mga biktima ug iya dayon kining aksyonan ug paimbestigahan. (Stephanie V. Berganio/NJM) --Gipatik sa mantalaang SuperBalita Cagayan de Oro Abril 21, 2012.
Linkback:
https://tubagbohol.mikeligalig.com/index.php?topic=49466.0
