Ni Darrel Carumba (Banat) Updated November 06, 2011 12:00 AM
CEBU, Philippines - Patay nang nakit-an ug nanimaho na ang patay’ng lawas sa usa ka tiguwang kinsa namatay sa lunos o sa balatian nga nag-inusara sa iyang payag didto sa Sityo Pinggan barangay Pakigne lungsod sa Minglanilla niadtong Biyernes sa alas 5:00 sa hapon.
Si Benidecta Pasenio, 56, kinsa lumad nga taga dakbayan sa Canlaon, napalgan sa iyang silingan nga si Perigrina Dapitan nga nanimaho na sulod sa iyang payag.
Si PO2 Abelino Seloria sa Minglanilla Police Station mibutyag sa Banat News nga ang namatay walay pamilya o paryente sa maong lugar hinungdan nga pagahatdan nalang og pagkaon sa mga silingan.
Kumo kay walay nag-atiman gituohan nga kun wala mamatay sa balatian ang maong tiguwang, malagmit namatay kini sa lunos. Ang mga silingan usab niini misugilon sa kapolisan nga sa miaging semana miawhag na ang namatay nga dili na siya magpahatod pa og pagkaon. Sukad niadto wala na nila kini hikit-i nga migawas sa iyang payag.
Ang maong lola giingong suholan nalang sa pagpangguna sa uma sa iyang mga silingan
Matud pa sa mga silingan nga usa na ka tuig kaping nagpuyo sa ilang lugar gikan sa Negros ang biktima apan wala sila makamatngon nga may mga anak o paryente nga miduaw niini. (WC) (BANATNEWS)
Linkback:
https://tubagbohol.mikeligalig.com/index.php?topic=44135.0
