MikeLigalig.com

By Ven Arigo
Gikalipay sa mga kaswal sa probinsiya
ang usbaw sa inadlawng sweldo

GIKALIPAY sa daghang kawaning kaswal ang pagsaka sa ilang inadlawng suholan sa kagamhanang probinsiyal ubos ni Gob. Arthur Yap ug Bise Gob. Rene Relampagos.

Giaprubahan sa Sangguniang Panlalawigan (SP) ang usbaw nga P20 kada adlaw---gikan sa P320 ngadto na sa P340---ug ang wage increase isibog pa gyod sa pagpatuman sugod niadtong Enero.

Kini nagkahulogan og dakong salary differential nga tingob nilang madawat atol sa Pasko.

Matud sa usa ka opisyal sa SP Secretariat, si Bokal Jade bautista maoy niduso sa ordinansa nga nag-usbaw sa suholan sa mga kaswal atol sa sesyon sa SP niadtong Martes.

Ang sesyon gipangunahan ni Bokal Ricky Masamayor, kinsa gipili mismo sa hunta probinsiyal isip acting presiding officer, ug Bautista isip acting floor leader.

Niadtong usang semana, nisugyot ang gobernador atol sa tigom sa capitol Management Executive Board (MEB) nga ihatag kutob sa maabot ang mga benebisyo sa mga kawani sa kapitolyo sa pagtapos sa tuig.

Dungan niini ang pag-usbaw sa sweldo sa mga kaswal, nga gisuportahan sa Local Finance Committee (LFC) sa kapitolyo pinaagi sa resolusyon.

Matud sa SP Secretariat, nirekomendar mismo si Yap pinaagi sa suwat ngadto sa SP aron aprubahan ang paghatag og dugang sa inadlawng sweldo.

Ang resolusyon sa LFC giduso sab ngadto sa SP isip dugang nga basehanan, sumala sa opisyal sa SP Secretariat.

Ang isyo gituki sa mga sakop sa SP atol sa ilang pre-session conference hangtud nga ilang giparubahan sa sesyon na mismo.

DILI UNTA UNA IPALUSOT

Matud sa taga-SP, buot ni Bokal Victor Dionisio Balite nga ipaagi una og second reading ang ordinansahon aron tun-an pod una sa komiteba ang casual daily wage increase.

Apan si Bautista maoy nangusog ug niinsistir nga i-exempt sa three-reading rule ang ordinansahon aron maaprubahan dayon ang usbaw sa sweldo sa ilang sesyon niadtong Martes.

Kini maoy tinuod---ug sukwahi sa tinu-is nga estoryang gikatag sa pipila ka mga propagandista sa pulitika nga tigdaot sa probinsiya. (Ven rebo Arigo / Capitol foto, Ramil Rodela)

Book online travel tickets in Asia, Australia and New Zealand at:
https://12go.asia/?z=3467325



Linkback: https://tubagbohol.mikeligalig.com/index.php?topic=91229.0