Padayon nga nagmulo ang mga katawhan, ilabina gyud ang mga sumasakay, tungod sa walay kukaluoy sa mga driver sa pampublikong sakyanan sa ilang pagsagpa sa taas nga pletehan bisan sa pagbarato na sa gasolina.
Ang labing tinuod ang presyo sa gasolina karon, sumala sa world market, mas barato pa sa presyo niadtong 2005.
Naaghat ko sa pagyagyag ning maong panawagan sa LTFRB ug LTO sa pamasin kung aduna ba silay mabuhat sa suliran sa mga katawhan. Ambot lang kaha ug nagpakabuta-bungol lang ba kaha sila niini.
Daghan na ko ug naestorya nga mga kaila ug di kaila – ug nagpatigbabaw ang usa ka lisud tunlon nga kamatuoran nga daghang mga driver ang nag-abusar na sa ilang presyo sa pletehan. Sulod ug gawas sa Tagbilaran, nagpareha lang ang tanang driver sa bisan unsang matang sa sakyanan (puyra lang sa mga tarong).
Niadtong pagsaka sa presyo sa gasolina, gitumanan ang mga driver sa ilang hangyo nga motaas ang pletehan sa mga sakyanan.
Apan karon nga mikunhod na pag-ayo ang presyo sa gasolina, ang mga driver ang nagmagahi sa pagpaubos sa ilang pletehan. Mga bintahoso gyud!
Natuok pag-ayo ang atong mga katawhan sa mahal nga pletehan karon bisan pa man sa pag-barato sa gasolina. Ngano ang LTFRB ug LTO ug ang local nga pangagamhanan walay nabuhat alang sa pagsumpo ning mga abusadong driver sa Bohol?
Dili man hinuon tanan ang nagmagahi apan kasagaran ug kadaghanan kanila ang wa motuman sa gilagda na sa balaod. Ug kay lagi nihit man ug sakyanan ning atong probinsya, taas ang demand apan ubos ang supply, nagpatuyang nalang pud ning atong mga sakyanan sa ilang ngil-ad nga binuhatan.
Naguol gyud ko maghuna-huna sa ping-it sa kapait sa presyo sa pletehan karon sumala sa gisubay sa mga tawo nga akong naestorya dili pa lang dugay sukad sa akong pag-abot.
Didto sa Guindulman, pananglit, naestorya nako kagahapon ang usa ka pasahero nga kauban nako nagbarog sa dalan nga matud pa niya bisan duol ra kaayo ang adtuan, kinse pesos ang pangayo sa ubang mga traysikol driver sa Guindulman. Sanglit ang tawo mao man ang nanginahanglan ug sakyanan, mapugos nalang sab ta ug hatag.
Ug kami sab (tulo mi) nga mibyahe gikan sa Anda paingon sa Guindulman, gipanguyaan mi ug dos sentos pesos kay mao kono ang pletehan karon. Ug tawo kong way libog ug dili gusto makiglalis labina kay mibunok ang kusog nga ulan ug lapok pa gyud, napugos mi ug hatag sa dos sentos pesos bisan sakit sa among buot.
Kung mahimo maghiusa ang mga LGUs, LTFRB, ug LTO nga unta masumpo kining bintahoso ug abusado nga kinaiya sa mga driver, mga mapahimuslanon sa kahigayonan.
Akong giawhag ang mga katawhan nga kung mahimo ug makaya pa sa lapa-lapa, magbaklay nalang ta sa atong adtuan kay gawas nga maluwas ta sa heart attack (isip exercise ang lakaw) dako pa gyud ta ug matigum nga salapi nga mahimo natong gamiton pagpalit sa lamiang pagkaon.
P.S. Utro pud ning mga fastcrafts, ang Cebu to Tagbilaran one way karon P500 na.
Linkback:
https://tubagbohol.mikeligalig.com/index.php?topic=16995.0
