DSWD: Magbantay sa nanglista
Aron kunohay maka-apil sa 4Ps
TAGBILARAN CITY, Bohol, October 17 (PIA)— Kun ugaling may nagpatuo nga mga sakop sa Department of Social Welfare and Development sa Central Visayas nga nanuktok sa inyong panimalay aron paghimo og house-to-house nga pagpanglista sa mga aplikante sa mga buot magpasakop sa Pantawid Pamilyang Pilipino Program (4Ps), dudahi na nang daan.
Kini human ang DSWD mipagawas sa pahibaw nga dinhi sa Bohol, ilabi na sa mga kalungsuran sa Carmen, Anda ug Garcia Hernandez, may gikataho na nga mga nagpatuo nga taga DSWD apan, dili diay sakop sa ahensya.
Butyag ni DSWD-7 Regional Director Rebecca Geamala, nakadawat na ang ilang buhatan sa mga taho nga gikan sa ilang mga tawo sa kalungsuran kabahin sa mga pagpanglingla, ug tungod niini, giaghat ang katawhan sa pagma-ampingon ug itaho dayon sa labing duol nga City o Municipal Action Team Office sa DSWD-7.
Gidugang niya sa pagpahibaw ngadto sa publiko nga ang DSWD wala gayud mangulekta og bayad gikan ni bisan kinsa aron mamahimo nga benepisaryo sa Pantawid.
Kahinumduman nga ang pagpili sa mga masakop sa Pantawid napasubay sa estrikto nga basehan sa National Household Targeting System for Poverty Reduction, o kadtong nailhan nga Listahanan.
Kini napasubay sa pagtimbang timbang sa ang-ang sa kakabus base sa pisikal nga dagway sa panimalay, gidaghanon sa mga kwarto niini ug sa mga sakop sa balay, ang ilang kahimtang sa tubig nga magamit sa balay, ug daghan pa nga basehanan nga maka-angin sa kahimtang sa ilang pamuyo.
“Bisan pa kon ang panimalay human na og gi-again na sa Listahanan enumerator, wala kini magpasabut nga automatic na nga ang panimalay nahimo na nga sakop sa mga benepisaryo sa Pantawid o sa bisan unsang programa sa kagamhanan,” gipasabut ni Director Geamala.
Kini tungod kay ang tanang makuha nga kasayuran gikan sa mga panimalay nga nasubay sa Listahanan ipaagi pa gihapon sa us aka proseso gamit ang Proxy Test o PMT.
Ang PMT usa ka modelo sa statistics nga magbanabana sa kita sa banay nga nia ning panimalay subay usab sa mga basehanan nga nasukip sa family assessment form sa Listahanan enumerator.
Ang mga panimalay nga may gibanabana nga kita nga katumbas o labaw pa sa labing bag-o nga ang-ang nga giisip nga provincial poverty thresholds, isipon sila nga wala maglisud samtang kadtong may ubos nga kita ga wala makaabut sa poverty threshold, isipon sila nga kabus.
“Sa panahon nga ang usa ka banay nahisakop sa mga kabus, daku na ang ilang tsansa nga mahimong benepisaryo sa nagkadaiya nga programa sa kagamhanan sama sa 4Ps.
Pana, ang ilang pagkaapil sa mga programa nagdepende pa gihapon sa mga basehanan sa programa ug sa mga basehanan sa aron makaapil, dugang sa DSWD.
Gawas nga kinahanglang maapil sa giisip nga kabus subay sa Listahanan, ang benepisaryo sa Pantawid kinahanglang may bata nga nagpangedaron og 0-18 anyos o may nagpuyo nga buntis sa panahon sa pagsubay sa Listahanan team.
Usa pa, makaapil lamang sa 4Ps kon ang banay mihukom sa ilang kabubot-on nga masubay sa mga kondisyones sa programa isip ilang responsibilidad. (rahc/PIA7/Bohol)
HULAGWAY
MATMATNGON, matud pa sa DSWD, sa mga tawo nga nagpakaaron ingon nga nga magpatuo nga taga DSWD ug nanglista aron mahisakop kunohay sa Pantawid. Ang DSWD Listahanan Team nga nakauniporme ug may tukmang pagpaila sa mga barangay lamang ang mosubay sa mga panimalay alang niining katuyu-an. Labaw mibahimangno ang DSWD nga walay pangayoon ni bisan kinsa aron makaapil sa programa. Kini taliwala sa taho nga may nanglista pinaagi sa house to house nga sistema sa Carmen, Garcia Hernandez ug Anda. (DSWD7)
Book online travel tickets in Asia, Australia and New Zealand at:
https://12go.asia/?z=3467325Linkback:
https://tubagbohol.mikeligalig.com/index.php?topic=91110.0
