Sikwate gikan sa Atbang Farm,
Usa sa labing lamian sa nasud
TAGBILARAN CITY, Bohol, October 28, (PIA)—Napili ang usa ka sikwate nga hinimo sa usa ka Bol-anonn gikan sa kakaw nga gitanum usab sa Bohol, isip usa sa lima ka labing lami-an nga sikwate sa tibuok nasud.
Ang sikwate nga gikan sa Atbang Farm ni Efrenia Holt maoy usa sa mga minggawas nga labing lami-an nga sikwate human kini maoy gipili sa 30 ka mga minghukom kinsa usab mihigup gikan sa 38 ka nagkadaiyang timpla sa sikwate gikan sa tableya.
Ang tableya, nga gikan sa kinatsila nga tablea, kaniadto mga eskinado nga hinulma nga ginaling nga sinangag nga liso sa cacao. Karon ang tableya kasagaran lingon na nga mura og kamanoon, ug usahay nagdagway og hinulma nga pinugnit sa tulo ka tudlo.
Kini tunawon sa ininit nga tubig ug butangan man og kamay o panam-is, maoy usa sa mga labing kinaham nga imnon sa mga Bol-anon sa pamahaw o sa pama-init.
Didto sa labing bag-o pa lamang nga gitapos nga nasudnong pagtapok sa mga nananum sa kakaw, mga tighimo og tsokolate ug sikwate ug sa tanan nga nanginabuhi sa paghimo og tableya, namaligya hangtud na sa naghimo og mga giproseso nga sinangag nga liso sa kakaw nga giila nga Kakao-Konek didto sa Lanang District sa Davao City, napili ang tableya sa Atbang Farms uban sa upat pa ka lami-an nga sikwate.
Matud pa sa mga tigpasiugda nga Cacao Industry Development Association of Mindanao, kapin sa us aka libo ang mingtambong sa pagtapok gikan sa 14 ka rehiyon sa nasud.
Usa sa mga gikahinaman nga kalihukan sa Kakao-Konek mao ang pagpili sa Top 5 Philippine National Tablea Drink.
Ang sikwate nga entry sa Atbang Farms maoy usa sa 5 ka opisyal nga entry nga gisalmot sa Bohol sa nahisgutan nga bangga.
Kauban sa Atbang Farm ni Efrenia Holt, (Calape), ang Bohol Balai Cacao Enterprises ni Marie Frances Macabenta sa Manga District, Tagbilaran City, ang kang Audrey’s Bakery ni Audree Arellano (Panglao), ang Canjulao League of Women, Jagna, Bohol ug ang Aurora’s Tablea ni Gina Solis (Loay).
Mikabat usab sa 12 ka Women Micro Entrepeneurs (WMEs) ang misalmot sa duha ka adlaw nga Kakao Konek aron usab mapalig-on niini ang mga network ug masayran usab ang mga kabag-ohan sa pagpanguma sa kakao.
Matud ni Efrenia Holt, tag-iya sa Atbang Farm sa iyang facebook account, nagsugod siya sa pagpananum og kakao niadtong 2011 sa iyang umahan sa Calape, Bohol.
Apan sa dihang gibagyo sa Senyang, halos malampurnas ang iyang kakawan, ug dili pa igo, nabiktima pa usab kini sa linug sa 2013.
Apan, dala usab sa gugma sa panguma ug sa saad sa maayong negosyo, wala moundang si Holt sa pagatiman sa iyang mga kakao, nani iya pa kining gipamaayo, sa abag sa mga sakop sa komunidad nga iyang gipatrabaho.
Ang tableya sa Atbang Farms mapalit na sa mga malls ug sa pili nga mga Hotels ug Resorts sa Panglao ug sa Tagbilaran City. (rahc/PIA-7/Bohol with vligan/DTI)
Book online travel tickets in Asia, Australia and New Zealand at:
https://12go.asia/?z=3467325Linkback:
https://tubagbohol.mikeligalig.com/index.php?topic=91203.0
