MikeLigalig.com

Pagpabakuna batok polio
Gihingusgan sa 0-5 anyos

TAGBILARAN CITY, Bohol, November 13 (PIA)— Ang pagka-kompirmar na ang ika upat ka kaso sa kagaw sa polio nga type 2 sa usa ka tres anyos nga batang babaye sa Maguindanao, nagpalig-on sa panginahanglan nga pabakunahan na gyud ang mga bata nga nag-edad og 5 paubos.
 
Matud sa mga tinugyanan sa kasanihan, ang kasamtangan nga pagpatim-aw og usab sa polio, resulta sa ubos nga kadaghanon sa mga bata nga nagpabakuna batok sa gika-intapan nga sakit, ug  ang wala mabatasan nga kalimpyo sa palibut ug panglawas.

Ang bata nga apektado sa ika-upat nga kompirmado nga kaso sa polio, wala maka-agi og bakuna sa oral-polio-vaccine (OPV) ug sa diha nga napadala ang sample sa hugaw niini ngadto sa National Institute of Infectious Diseases (NIID) sa Japan, namatud-an nga positibo kini sa circulating vaccine derived polio-virus 2 (CVDPV2).

May nataho na usab nga kaso sa polio sa Laguna, nga natumbok nga immunodeficiency-related VDPV (iVDPV2).

Agi og tubag sa bag-o nga mga kaso nga namatikdan sa mga bata sa nagkanit nga lugar sa Bangsamoro Autonomous Region sa Muslim Mindanao (BARMM), ang Department of Health (DOH) naghimo na sa pagpamakuna aron makuha ang outbreak immunization sa Lambayong (Sultan Kudarat), Datu Piang, ug Datu Paglas (Maguindanao) niadtong November 4-8 alang sa 18,268 ka mga bata nga ang edad ubos pa sa 5 anyos.

Kini, seun pa sa DOH, 89.2% na sa kinatibuk-an nga mga kabataan nga 0-59 ka buwan ang pangidaron.

Gihimo na usab ang dinungan nga polio-vaccination campaigns niadtong Octobre 14-27 ug nabakunahan ang 1,628,717 ka kabataan nga naa na sa 95.5% sa kinatibuk-an nga target.

Ang sunod nga rounds sa pagpamakuna mahitabo sa Novembre 25 ngadto sa Decembre 7 sa National Capital Region (NCR) ug sa tanan nga lalawigan sa Mindanao diin gitumong ang 4,388,281 ka bata nga wala pay 5 anyos.

Ang polio (poliomyelitis) kasagaran moigo sa mga bata nga 5 ang edad paubos.

Ang usa sa matag 200 ka impeksyon sa polio, moresulta sa dili na maayo pa nga pagkaparalisa, ug sa mga maparalisa, 5% ngadto sa 10% mamatay kay maparalisa ang ilang pangginhawa.

Matud pa sa DOH nga basta may usa ka bata pa nga may impeksyon sa polio, nameligro ang tanan nga bata sa tibuok nasud kay mahimo kining matakdan.

Ang polio, labihan ka mananakod nga sakit dala sa kagaw nga mokamang ngadto sa nervous system, ug mahimong makaparalisa sa tawo pipila lang ka oras human kini matakdan.

Ang kagaw sa polio mahimo nga ikapanakod pinaagi sa pagkaon ug pag-inum sa hugaw sa tawo nga mahimong masagol sa pagkaon, o sa nahugawan nga pagkaon o imnonon.

Ang kagaw nga matulon, modaghan kon anaa na sa tiyan.

Kasagaran, ang masakit sa polio magsugod sa hilanat, pagkaluya, labad sa ulo, pagsuka-suka, pagpanikig sa li-og ug pagpanakit sa mga kamot ug tiil.

Sanglit wala pay tambal sa polio gawas sa pagpanalipod niini pinaagi sa pagbakuna, ang bakuna sa polio nga OPV, mahimong ihatag sa makadaghan, aron sa tibuok kinabuhi ang tawo mapanalipdan. (rahc/PIA-7/Bohol)

Book online travel tickets in Asia, Australia and New Zealand at:
https://12go.asia/?z=3467325



Linkback: https://tubagbohol.mikeligalig.com/index.php?topic=91429.0