Kahit mahina ang boses, nagpaunlak ng panayam sa telepono si Rudy Fernandez nitong Sabado para pasalamatan ang mga taong nagdarasal para sa kanyang mabilis na paggaling.
Kasalukuyang nasa ospital si Rudy at ang asawa niyang si Lorna Tolentino nang ma-interview ng GMA entertainment talk show na “Startalk" upang hingan ng reaksiyon sa idinaos na healing Mass sa Christ the King Church kamakailan para kay Daboy.
Sa pag-uusap ng mga host na sina Butch Francisco at Lolit Solis kay Lorna, sumingit si Rudy upang personal niyang ipaabot ang kanyang pasasalamat sa mga taong nagmamahal sa kanya – lalo na ang sambayanang Filipino.
“Pasensya na mahina ang boses ko," paliwanag ni Daboy. “Salamat sa lahat ng pagmamahal na natatanggap ko…sa sambayanang Filipino…lahat ng mga kaibigan ko…at siyempre sa pamilya, salamat."
Sa kabila ng tila mahinang katawan, nagawa pang magbiro ni Rudy at punahin kung bakit mahina ang komunikasyon niya sa telepono.
Ayon kay Lorna, bumubuti ang kondisyon ni Rudy kahit nagkaroon ng komplikasyon ang ginagawang therapy sa asawa.
“Slowly he is improving…getting better each day. Although siyempre hindi naman gano’n kadali ang lahat ng mga bagay kasi nagkaroon ng complication si Rudy," paliwanag ni Lorna.
Sa tanong ni Butch kung saan humuhugot ng tibay ng loob si Lorna sa krisis na pinagdadaanan ng kanyang pamilya, sagot ng aktres: “Yun tibay naman hindi sa akin nanggagaling ‘yon, it’s also Rudy at mga bata… at the same time mga kaibigan, mga nagmamahal. Doon ka nakakakuha ng strength sa lahat ng nagdarasal na nagmamahal kay Rudy."
Sa panayam ay ipinaalam at binati na rin ng mga host ng Star Talk si Rudy dahil siya ang pinarangalan na “Natatanging Artista" award ng PMPC Star Awards.
Taglay ni Rudy ang sakit na periampullary cancer at sumasailalim siya sa Rexin-G therapy. - GMANews.TV
Linkback:
https://tubagbohol.mikeligalig.com/index.php?topic=12731.0
