Ni DOMILYN R. PICO
NAGTUBOD-TUBOD ang luha sa usa ka 26-anyos nga ginang dihang gisumbag, gisipa, giparok ug giguyod sa iyang mister alas 11 sa buntag Lunes, Agosto 08, sa Purok Mansanitas, Magugpo East, dakbayan sa Tagum.
"Wa lang ko mituman sa iyang sugo nga mopalit og kape, nasuko na siya," saysay ni Nena (tinuod nga ngalan gitago), inahan sa duha ka mga anak.
Gireklamo nini ang bana nga si Tonyo, hamtong, tindero.
Suma pa, mibalibad ang ginang nga motuman sa sugo sa bana tungod nagsakit iyang ulo.
Sa kasuko sa bana, gisipa siya sa tiil, gisumbag sa dughan, giguyod sa hagdanan, gibira ang buhok ug giparok sa bungbong sa ilang balay.
Nagkurog-kurog pa ang ginang nga miabot sa istasyon sa pulis nga nakamalong ug nagkugos sa anak nga babaye.
Desidido kini nga ipapriso ang bana nga giila niini nga isog apan nagpanuko siya dihang gidasig nga mopasaka og kaso batok sa bana ngadto sa korte sanglit wa nay mobuhi sa iyang pamilya.
Atol sa pagsulat ning balita, padung na ang kapolisan sa bana sa biktima aron temporaryo nga i-kustodiya sa mga pulis.
Gipatik sa mantalaang Superbalita Davao Agosto 09, 2016.
Linkback:
https://tubagbohol.mikeligalig.com/index.php?topic=82646.0