Giluba kay nasakpang may laing kagakos
Ni Jojo C. Ugdol (Banat) | Updated February 11, 2015 - 12:00am
CEBU, Philippines – Dili na madayon ang planong pagpakasal ug Valentine’s date karong petsa 14 sa Pebrero sa dugay nang managkapuyo human nga gidunggab sa babaye ang lalaki tungod kay nasakpan niining dunay kagakos nga laing babaye diha sa barangay Mabolo.
Ang gitanggong sa karsel mao si Gerlyn Vildosola, taga Mabinay, Negros Oriental samtang ang biktima naila nga si Al Tolentino, 21, taga Calatrava, Negros Occidental apan nag-ipon og puyo sa maong lugar.
Matud pa ni Senior Police Officer 1 Ruth Violango ang imbestigador sa Homicide Section nga nahinabi sa Banat News nga posibling selos ang hinungdan sa krimen.
Sumala pa ni Violango, si Tolentino mibutyag nga gikan pa siya sa kasilyas ug kalit siyang gidunggab sa kapuyo ug pagkahuman gipaak pa siya niini.
Ang babaye daling misibat apan nadakpan human sa hitabo samtang gidala sa Cebu City Medical Center si Tolentino. Sa paghinabi sa Banat News sa dinakpan wala siya kapugong sa kaugalingon pagkakita niyang dunay kagakos-gakos nga laing babaye ang kapuyo.
Matud niya nagplano na silang magpakasal karong Marso apan sa dili pa, nagplano silang mag-date sa Pebrero 14. “Nagtigom naman unta mi para kasal, manglaag pud daw unta mi karong 14(Pebrero), pero grabe na kaayo ang gibuhat niya nako,†matud ni Vildosola.
Tungod niini, si Vildosola miingon nga wala na’y kasal nga mahitabo kay iyaha na kining buwagan. – /EIM) (BANAT NEWS)
Linkback:
https://tubagbohol.mikeligalig.com/index.php?topic=79490.0
