Ni JEEPY P. COMPIO
USA ka Pakistani national ang mitiyabaw nga nagpatabang sa Tugbok Police Station kay gusto na siya makigbulag sa iyang Pinay nga asawa human niya nasayran nga bisan kinsa na lang ang mohuong niini sa ilang balay.
Si Abhar (bansagon gitago), 45, Pakistani-National, negosyante ug lumad nga taga Karachi, Pakistan, nagpuyo sa Deca Homes Subdivision, Barangay Tugbok, dakbayan sa Davao, nagpa-blotter sa kapolisan labot sa iyang sitwasyon uban sa asawa nga si Gretchin, 40.
Subay sa impormasyon nga nakalap sa SunStar SuperBalita gikan sa Tugbok Police Station, nasayran nga gusto na sa langyaw nga makigbulag ug buot niyang kuhaon ang kustodiya sa iyang anak nga babaye gikan sa iyang asawa.
Ang panghitabo nagsugod human iyang nasayran ug nasaksihan nga bisan kinsa nalang ang karelasyon sa iyang asawa nga daw wa nay gusto kaniya.
Naguol siya human iyang nasayran nga mi-text ang iyang asawa nga padung na sila sa Manila ug gidala ang ilang anak nga babaye.
Gusto sab unta sa langyaw nga bawion ang iyang napundar nga mga gamit, apan nakapangalan kini sa iyang asawa.
Sumala sa langyaw nga di na gayud siya makigbalik sa asawa gumikan hilabihan kining pagkapabigaon, magparemedyo ni bisan kinsa na lang, sulod pa gyud sa ilang panimalay, butang nga di na niya gusto nga ila pang maareglo.
Gusto na sab niyang mouli sa Pakistan ug didto nalang mag-negosyo.
Ang maong reklamo giduso na sa kapolisan sa Barangay Tugbok aron didto sila husayon.
Gipatik sa mantalaang Superbalita Davao Oktubre 24, 2016.
Linkback:
https://tubagbohol.mikeligalig.com/index.php?topic=83081.0