Ni JEEPY P. COMPIO
GRABENG tiyabaw sa usa ka mister sud sa Sasa Police Station human kalit siyang gibiyaan sa iyang misis, gidala ang ilang mga gamit alas 10:00 sa buntag niadtong Huwebes.
Ang insidente nga pagbiya nahitabo didto sa Zone Road, Barangay Pampanga, Buhangin District, dakbayan sa Davao.
Alas 12:30 sa udto naghilak nga nagpatala sa Sasa Police Station si alyas Pidot, 38, taga Zone Road, kinsa nagbutyag sa duty desk officer nga ang paghilak nalang ang iyang mahimo human gilayasan siya sa iyang misis.
Si Pidot nagsaysay nga dihang miuli siya sa ilang balay, wala na ang iyang asawa, gipangdala pa ang ilang mga gamit.
Giingon nga wala niya masayri unsay hinungdan nganong milayas ang iyang asawa, apan dako iyang pagtuo nga miuban kini sa laing lalaki.
Nasayran sa Sun.Star SuperBalita nga wa hinuon maguol ang nasampit nga bana tungod dagko na ang ilang duha ka anak, apan iyang gikagul-an, kay gipangdala ang ilang mga gamit nga ang uban niadto inutang pa.
Dugang nasayran nga sa wa pa milayas ang iyang misis, nakamatikod na kini nga dunay lahi nga linihukan ang iyang asawa, apan gibaliwala lamang niya kini.
Sumala ni Pidot nga kakuhaan unta kini'g pagtulun-an sa sama niya nga mister kinsa naningkamot apan wa damha nga mangita'g laing lalaki ang misis.
Gipatik sa mantalaang SuperBalita Davao Nobiembre 14, 2015.
Linkback:
https://tubagbohol.mikeligalig.com/index.php?topic=81383.0