Published by
The Bohol StandardAgi ug pagsaulog sa Mother’s Day karong semanaha, aduna lang koy pipila ka pagtulun-an nga ipaambit dinhi sa lindog sa Tumoy Sa Bangaw.
Diha koy nakaila sa airport nga taga Cebu nga didto nagtrabaho sa Africa. Usa siya ka operator sa Caterpillar nga heavy equipment sa Africa. Matud pa niya nako nga dili na siya matingala ngano nga pobre ang Africa. Kay sa iya dawng nakita sa mga lugar sa Africa nga iyang nabisitahan, ang mga babaye mao ang nagkayod ug trabaho: mao pa ang mobantay sa mga bata ug magdigamo sa pagkaon alang sa pamilya.
Matud pa sa akong amigo, kasagaran ang mga laki sa Africa, lingkud-lingkud lang, inum-inum, tabako-tabako, katawa-katawa uban sa mga barkada samtang ilang mga asawa maoy nagdaro ug nagtikad sa yuta, nagtakin pa jud ug masuso nga bata sa likud. Hilabihan kunong laina tan-awon sa bag-o pa sya didto sa Africa.
Nagpanglingo-lingo akong amigo samtang nag-asoy sa iyang mga nakita sa Africa. Nakaingon siya nga di lalim mahimong inahan sa Africa kay ang asawa maoy mopatulo sa singot gikan sa uma hangtud na sa pagpadagan sa panimalay samtang ang mga laki mouli lang ug motambid.
Dili ko segurado kung angayan bang ingnon ang mga inahan sa Africa nga “Happy Mother’s Day.†Seguro sa mga asawa nga ilang mga bana mga “canadian†(magdung-ag ka na dyan, manglampaso ka na dyan, manghugas ka na dyan), malipayon ang pagsaulog sa Mother’s Day.
Dinhi pud sa atong nasud, daghan pung mga inahan ug asawa nga murag lisud ipahiyom panahon sa Mother’s Day kay ang mga bana (pwera gaba lang) tua sige hapyod-hapyod sa hinuktang manok, hagpat ug tong-eyts, lingkud-lingkud gawas sa sira-sira store, tungab-tungab ug bahal nga tuba, ug mouli lang sa balay ug manghilam-os samtang ang mga asawa nagkadipo-dipo intawon sa trabaho.
Dili tanan ingon niini ang sitwasyon apan kung subayon sa mga kalungsuron ug kabaryohan sa atong nasud, pagkaluoy sa mga inahan ug asawa nga nagkonsomisyon sa pagkasugarol ug pagkapalahubog sa ilang mga bana.
Matud pa sa usa sa mga amiga nako nga mahadlok siya maminjo ug Pinoy kay basin himuon lang siya nga maid sa balay, unja ijang bana mahimong sugarol ug palahubog. Manimpalad nalang kuno siya sa Internet nga makakaplag ug puti nga maantigong mopangga ug mosagubang sa mga responsibilidad sa panimalay.
Apan dili pud lagi tanan natunhay kay duna pay mga Pinay nga naminyo ug puti nga nahimong punching bag sa ilang mga puti nga bana. Daghan pung Pinoy nga mga bana nga tam-is magmahal ug maghigugma sa mga babaye. (Pangutana lang mo ni Nong Fred Amora kay mura ug daghan ni siya ug nahibaw-an mahitungod aning mga butanga).
Kadtong mga dalaga nga nagbasa aning atong lindog sa Tumoy Sa Bangaw, moabot ra pud ang higayon nga mahimo mong inahan ug daghan ang mo-greet ninjo ug “Happy Mother’s Day.†Hinaut unta nga ugma damlag, inubanan sa mga pag-ampo, makatunong ang atong mga dalaga ug minjo ug bana nga dili tampalasan ug madagmalon kay ang Mother’s Day unya mahimo lang subo nga adlaw igpapalandong.
Dihay quotation nga akong nabasahan, nakalimot nako kinsay nagsulti, nga nag-ingon: “The best gift that a father can give to his children is to love their mother.â€
Linkback:
https://tubagbohol.mikeligalig.com/index.php?topic=12775.0
