MikeLigalig.com

Mas barato nga fastcraft
nagbyahe sa Tagb-Cebu

TAGBILARAN CITY, Bohol, June 12 (PIA)—Sa pletehan nga mas kubos kay sa kasagaran apan sa kaanindot, kamoderno ug ka limpyo, ubanan pa sa di hingtupngan nga pasilidad, gihanyag sa Island Water Shogun Shipping ang ilang duha ka barko nga catamaran isip pili-anan sa kasakyan alang sa ruta nga Cebu-Tagbilaran-Cebu.

Kompetensya sa nahiluna na nga OceanJet ug Supercat, ang mga barko sa Island Waters nga MV Island Biri ug MV Island Calayan, pareho nga catamaran ang desinyo ug may katas-on nga 29 metros ug may labing kusog nga dagan nga naa sa 18 ka knots.

Hinay man og dyutay sa iyang kompetensya nga mga fastcrafts, ang Island Waters nagtumong nga motanyag sa mga nananakay sa kasinati-an sa kahamugaway ug pagpalabay sa de-kalidad nga oras sama sa cruise speeds.

Ang kinatibuk-an nga byahe sa Island Waters nga mga barko, moabut sa 2 ka oras ug 15 minutos, mga  kinse minutos nga langay kay sa mas paspas nga mga fastcraft sa nahisgutan nga ruta.

Apan, matud pa ni Trisha dela Pena didto sa Press Conference luwan sa nahisgutan nga barko, buot nila nga ipatagamtam sa mga sumasakay ang kasinati-an nga sama sa cruise: hinay apan de kalidad nga oras, ug wala nay lain pang gi-apas apan kasinati-an sa kahamugaway.

Gidesinyo sa ilang chairman sa kompanya, ang nga bag-ong barko napadagan sa duha ka dagko nga Cummins diesel engines nga may halos 2,000 ka horsepower sa iyang gikusgon nga 18 ka knots.

Gawas pa, ang mga barko sa Island Waters may mas luag nga mga lingkoranan nga panit, may limpyo nga mga restrooms, pulos airconditioned nga mga cabins ug may maabi-abihon nga mga tripulante ug mga opisyal sa byahe.

May onboard snack bar usab kini samtang ang ilang luggage storage, naa sa sulod sa barko aron mapaneguro nga walay gamit sa pasahero nga mabasa o masabligan sa tubig dagat.

Nagtanyag sa duha  ka accommodations: ang Island Waters nga mga barko may Premium Economy nga tag P475 ug Business VIP nga naa sa tag P675 ang usa  ka byahe, may libre nga kape, WIFI ug movie streaming.

Ang Island Biro mokarga og 160 ka pasahero lamang samtang ang Island Calayan makakarga og 162 ka pasahero, segun pa ni dela Pena.

Gikatakda nga mobalhin na gayud sa Pier 1 alang sa permanente nga dunggu-anan, ang Island Waters tua pa magagikan sa Pier 3.

Hinuon, may barker sila nga tua sa gawas sa Pier 1 ug mga libre sila nga shuttle gikan sa Pier 1 ngadto sa Pier 3, aron may makagiya samtang wala pa sila makabalhin. (rahc/PIA-7/Bohol)

* Today's Helpful Tip *
Tala app is a fast and easy way to borrow money, and it's used and trusted by many. Download Tala to join millions of Filipino users today! >>> http://inv.re/9o3vp



Linkback: https://tubagbohol.mikeligalig.com/index.php?topic=91587.0