Mao ni ang balita the other day.Managsuon gitulis, 1 patay
MANAGSUON nga padulong na untang mouli sa ilang gipuy-an ang gitulis ug wa pa matagbaw, gipamusil pa gyud hinungdan sa kamatayon sa usa niini.
Kini nahitabo sa alas kuwatro sa kaadlawon kagahapon sa dalan Arlington Pond ug Lim Pian Teng, barangay Sta. Cruz, dakbayan sa Sugbo.
Patay dihadiha dayon ang maguwang nga si Vedasto Cursiga, 25 anyos, samtang ang manghod nga si Herbert, 21, anaa pa sa tambalanan.
Ang managsuon lumad nga taga barangay Putohan, lungsod sa Tubigon, Bohol apan nanimuyo sa Junquera Ext., ug pulos kawani sa Suria Korean Restaurant nga anaa sa
Ramos St., barangay Sta. Cruz.
Matod pa, ang duha gikan nangaon og barbeque sa Larsian sa may Fuente Osmeña, ug nanglakaw na paingon sa pagpauli sa dihang ang insidente nahitabo.
Duha ka wa mailhing tawo ang nagbarog kilid sa karsada ug ang usa niini kalit nibunot og armas dayog deklara’g tulis.
Wa maglangay og panahon, ang mga tulisan mikuha gilayon sa cell phone sa manghod ug ingon man sa pitaka sa maguwang.
Human makuha ang mga butang, matod pa ang manghod nangutana sa mga tulisan kon nganong sige pa kini’g tion sa armas nga unta nakuha naman nila ang ilang gusto.
Sa wa damha, gipusil na hinuon siya, apan niadtong tungora wa makabuto ang pistola. Ang maguwang nga nakabantay niini, nisuway kini sa pagsukol ug niilog sa armas.
Niining higayona, napusilan na ang maguwang nga niresulta sa pagkaigo sa dughan niini ug namatay dihadiha dayon.
Ang manghod naigo usab sa iyang walang bilahan ug anaa karon sa pribadong tambalanan sa dakbayan sa Sugbo.
Matod pa, sa nakasaksi nga ang duha ka tulisan daling naglakaw paingon sa Osmeña Blvd. ug nisakay’g taxi paingon na sa downtown area.
Ang kapulisan padayon karon sa dugang pang imbestigasyon.
Si Cebu City Police Director Senior Supt. Patrocinio Comendador niingon nga mga local boys lang ang nitulis sa duha tungod sa ilang gipakitang pamaagi nga gipusil pa
ang mga biktima.
Iyang gibutyag nga aduna na silay idea kon taga diin ang naghimo sa ingon ug mao kini karon ang gitrabaho sa mga sakop sa homicide section, theft and robbery section
ug ingon man sa mga sakop sa IDMB.
Gibutyag ni Comendador nga bag-o lang silang nagtagbo sa mga barangay kapitan sa Santa Cruz, Sambag II, Ramos ug mga silingan barangay aron sulbaron ang mga
krimen sa mao nga dapit.
Wa isalikway ni Comendador ang pagtuo nga ang mga tulisan mao kadtong ila nang nadakpan kaniadto apan nakagawas na sa bilanggo.
Ang hepe sa homicide section nga si Insp. Vicente Velasquez nibutyag nga basi sa ilang imbestigasyon tulis ra gayod ang motibo sa krimen apan nisukol lang ang mga
biktima hinungdan nga napusilan.
Linkback:
https://tubagbohol.mikeligalig.com/index.php?topic=22422.0