Sinulat ni Nestor DaarolDYTR ReporterNaukay ang mga magbabalaod sa Sangguniang Panlalawigan kalabot sa usa ka matod pa hitabo nga gitaguan sa lalawigan sa Bohol. Atol sa sesyon sa milabay nga Martes (Desyembre 11, 2007) gipresentar ni Board Member Maria Fe Camacho Lejos ang kabahin sa lindog ni Leo Lastimosa (Usa ka inilang komintarista sa radio, telibisyon ug pamantalaan sa Sugbo) sa pamantalaang The Freeman sa milabay nga Desyembre 08, 2007.
Nakurat si Lejos sa dihang nagpadayon ang ilang sesyon sa dihang usa ka papil nga kopya sa lindog ni Lastimosa ang gitunol sa reporter sa estasyon DYTR nga si Dave Responte . Wala maglangan si Lejos human mabasa niini ang unod sa papil gipresentar dayon kini ngadto sa iyang mga kauban atol sa Other Matters nga porsyon sa sesyon. Si Lejos mao ang Chairman sa Committee on Peace and Order sa SP og nabalaka kaayo sa maong kasayuran
Mao kini ang kabahin sa column ni Mr. Leo Lastimosa nga Arangkada sa The Freeman nga giulohan ug “Ang tinaguan sa Bohol?†nga gibasa ni Lejos:
“Mga turistang langyaw gitulis samtang nanuroy sa Bohol. Unom ka tinun-ang Hapones nga nagsakay og coaster gibanhigan sa tulo ka tulisan sa Barangay Nan -od, Sierra Bullones, gitionan og mga rebolber ug gipanguhaan sa ilang alahas, cellular phones ug kuwarta. Nakasibat ang mga tulisan bisan kun ang mga turista gikuyogan og polis gikan sa Kampo Dagohoy sa Tagbilaran City.
Kuwestiyonable nang daan nganong way nahimo ang polis pagpanalipod sa mga turista. Kuwestiyonable sang gikatahong kapakyas sa kapolisan sa Bohol pagpahibawo sa ilang kadagkoan. Labing kuwestiyonable ang gikatahong pagpasidaan nila sa mga biktima sa di pagsaba sa ilang kasinatian. Gikahadlokan nga di ni unang higayon nga gitagoan ang mga krimen batok sa mga turista.
* * *
Angay’ng pasidunggan ang mga Bol-anon sa malambuon nilang industriya sa turismo. Usa ko sa nakatilaw sa mainiton nilang pag-abi-abi ug hapsay nga pagpatuman sa tour packages pila na ka Semana Santa ang nilabay. Di ko gustong motuo nga ang pagpamakak maoy usa sa sukaranan sa ilang kalamposan pagdani sa lokal ug langyaw’ng mga turista.
Angay’ng angkunon sa kadagkoan sa Bohol nga ang pagdagsang sa mga turista makadani sab sa mga kriminal. Mas dali ning masulbad kun angkunon nga duna silay problema inay paundayonan ang pagpaka aron-ingnon nga giurom lang ang ilang mga bisita. Di katabonan ang atraso sa ilang kapakyas pagsikop sa mga tulisan pinaagi sa pagpasiugda sa mas dakong atraso pagtago sa mga krimen gikan sa katawhan.â€
Gumikan niini ang komitiba sa kahusay ug kalinaw maoy gitahasan sa SP nga moimbistigar niini uban sa komitiba sa turismo . Gusto sa mga bokal nga masuse gayod kining maong hitabo kon unsa kini katinuod kay matod pa ni Board Member Lejos nga kon namakak si Lastimosa sa iyang gisulat angayan lang nga iya kining korihian, “Piro kon tinuod kini maayo gyud nga dunay reporma sa atong mga kapolisan ilabi na sa paggukod sa mga kriminal,†dugang pa ni Lejos sa dihang nahinabi sa JBBN.
Human sa sesyon dali nga gitawagan ni Lejos si Lastimosa nga didto sa kaulohan. Gisaysay sa bokal nga mipasalig kaniya si Leo Lastimosa nga hatagan siya ug kopya sa blotter kalabot sa maong hitabo nga tulis sa mga istudyanting hapon didto sa Nan-od lungsod sa Siera Bullones.
Usa ka kasaligang tinubdan nga anaa usab sa nigusyo sa turismo nga dili lang magpahingalan ang mibutyag ngadto sa JBBN nga tinuod ang maong hitabo apan dugay na kini mga duha na ka bulan ang nakalabay. Gani matod pa niiini nga naukay usab sila gumikan kay makadaghan sila gipatawag sa usa ka dakong player sa turismo dinhi aron lang mapugngan nga dili makagawas ang maong balita ngadto sa media.
Gidugang pa niini nga atol sa maong hitabo adunay duha ka mga Tourist Police nga kuyog ang maong mga estudyanting hapon. Gani matod pa niini nga kadudahan usab kay gawas nga walay nahimo ang duha ka police batok sa tulo ka mga tulisan ang driver sa coaster nga naila sa pangalang Dave wala kuhai sa iyang cellular phone.
Gidugang pa niini nga ang travel agency nga nagdala sa maong mga hapon mao ang gipanag-iya sa asawa ni Walter Sultan. Wala makatug-an sa JBBN sa insaktong petsa sa hitabo ang tinubdan apan iyang gisiguro nga anaa kini sa bulan sa Septembre ug Oktobre.
Gisuwayan ning tigbalita ug tawag si Police Superintendent Edgardo Ingking apan nakakyas kita gumikan kay adunay kini giatindihan nga tigom.
Sa iyang bahin si Board Member Corazon Galbreath ang Chairman komitiba sa Turismo sa SP sa Bohol namahayag nga kwestyunabli ang gibuhat ni Leo Lastimosa sa pagsuwat sa niini kay iyang giakosahan ang mga leader sa Bohol sa pagtago sa kamatuoran. Apan dugang pa ni Galbreath nga kong ang ilang gilantaw mao ang kalambuansa turismo sa Bohol ngano man usab nga ilang ipabutang sa newspaper ang mga dautang balita.
Sa iyang bahin ang abugadang magbabalaod nga gikan sa Trisero distrito nga si Bokal Aster Piolio namahayag usab nga kon dili mapamatod-an ni Lastomosa ug dili niya masuportahan ang iyang gusuwat angayan lang nga pasakahan ug kaso ang komintarista ug ingon man sa pamantalaan nga gisuwatan niini aron malikayan na ang pagamit sa katungopn sa prensa aron pagdaot sa repotasyon sa usa ka probinsya.
Samtang si bokal Alfonso Damalerio II sa unang distrito kinsa kauban ni Leo Lastimosa sa Kapisanan ng mga Brodkaster sa Pilipinas kon KBP mihangyo ngadto ni Lastimosa sa pagsumiter sa kamatuoran uban sa mga ibidinsya aron sa pag-justipy sa maong matod pa hitabo, kay sumala pa ni Damalerio nga kini napatik sa lapad nga serkulasyon nga pamantalaan makaapikto gayod kini sa turismo sa Bohol.
Sa pagsuwat ning balita wala pa madawat sa buhatan ni Board Member Maria Fe Camacho Lejos ang gisaad ni Lastimosa nga kopya sa blotter nga iyang gibasihan sa unod sa iyang gisuwat. Apan giklaro gyud ni Lastimosa ngadto ni Lejos nga blotter sa pulis ang iyang gibasihan ug wala siya magtumo-tumo.
Linkback:
https://tubagbohol.mikeligalig.com/index.php?topic=7492.0
