Moreno nagpabilin sa City Hall
Ni STEPHANIE V. BERGANIO
KANHI Cagayan de Oro City Mayor Oscar Moreno nagdumili ug pagnaog isip mayor sa dakbayan bisan pa man sa pagsilbi sa Department of Interior and Local Government (DILG) Northern Mindanao sa dismissal order nga gipagawas sa buhatan sa Ombudsman.
Niadtong Huwebes sa gabii, si Vice Mayor Caesar Ian Acenas ang naghurar isip bag-ong mayor human gitangtang pagkamayor si Moreno.
Si Konshal Candy Darimbang nga maoy naghupot sa pinakadaghan nga boto maoy magsilbing bise-mayor sa dakbayan. Sila nanumpa ubos ni Assistant City Prosecutor Abdullah Macagaan.
Sa usa ka press conference, giangkon ni Moreno nga dakong hagit sa iyang kinabuhi ang nahitabo ug gani wala siya makatulog og hunahuna sa kalit nga desisyon sa Ombusdman ning panahona.
Giingong nagpabilin usab siya nga mayor sa dakbayan tungod kay malaumon sila nga aprobahan ang ilang giduso nga TRO ug dunggon ang iyang kampo.
Gibutyag usab niini nga confident siya nga sa katapusan mogawas ang kamatouran apan ang mando ning panahona iyang dawaton tungod kay mubo lamang kini nga kalampusan gikan sa mga midaot kaniya.
Dugang niini nga naluoy lamang siya sa katawhan sa dakbayan sa Cagayan de Oro.
Gipasalig ni Moreno nga dili matapos ang iyang pakigbisog nga mogawas ang kamatouran. Gilauman usab sa kampo niini nga dili balewalaon ang ilang giduso nga temporary restraining order sa Court of appeals.
Ang dismissal order gisilbi ni Ivy Jadap sa DILG Northern Mindanao niadtong Huwebes sa hapon ug mihatag og kopya kang Acenas.
Gibutyag usab ni Nilo Castañares kinsa DILG Northern Mindanao Director nga ning panahona si Acenas na ang ilang gideklara ug giilang bag-ong Mayor sa siyudad tungod kay mando kini sa Ombudsman ug walay papel nga misupak niini sama sa TRO.
Malipayon si Acenas sa pagdawat sa bag-ong posisyon ug gibutyag niini nga unta mohawa na lamang si Moreno sa iyang buhatan kay kini man ang bag-ong kamandoan ug aron makasugod siya sa pagserbisyo sa katawhan isip amahan sa dakbayan.
Gipatik sa mantalaang SuperBalita Cagayan de Oro Nobiembre 14, 2015.
Linkback:
https://tubagbohol.mikeligalig.com/index.php?topic=81308.0