MikeLigalig.com

Mingboluntaryo pakuha dugo
midaghan, supply kuwang pa

TAGBILARAN CITY, Bohol, Nov 12 (PIA)—Motuo man o o dili, gawas nga napadaghan ang pundo nga dugo alangs a mga pasyente nga nanginahanglan, napausab na ang pamaagi sa pagpundo niini.

Segun sa mga kasayuran nga gipaambit sa nag-una nga blood service facility sa Bohol: ang Governor Celestino Gallares Memorial Hospital (GCGMH) Blood Service Indices, naa lamang sa 15% sa kinatibuk-an nga nakolekta sa 2012.

Kahinumduman nga sa nasampit nga tuig, 340 ka blood units lamang ang natigum gikan sa mga mingboluntaryo sa pagpakuha og dugo.

Sa laing bahin, mikabat sa 5,120 ka blood units ang nakuha gikan sa pugos nga pagpakuha og dugo agi og hulip sa blood bag units nga gigamit sa ilang mga pasyente.

Ang tataw nga pagkausab sa trend sa pagkolekta sa dugo alang sa mga pasyente nga nanginahanglan ang napakita sugod sa 2016 kanus-a gihingusgan na sa kagamhanan ang programa nag giila nga National Voluntary Blood Services Program (NVBSP).

Ubos sa NVBSP, nga gipatuman sa Republic Act No. 7719 o ang National Blood Services Act of 1994, giduso sa kagamhanan ang boluntaryo nga pagpahuka og dugo (Voluntary blood donation) aron makahatag ang mga tambalanan sa igo nga kuhaanan sa luwas nga dugo ug aron mapatukod ang mga pundohanansa mga dugo nga nakolekta o blood banks.

Dungan niini, napatamla usab sa kadaghanan ang kasayuran sa ikatabang sa dugo isip bugtong tambal nga wala himo-a, aron makapa-inat pa sa kinabuhi.

Partikular sa ilang kampanya mao nga ang paghatag sa dugo, us aka pagpa-ambit sa kinabuhi, hinungdan nga giisip na nga bayanihon nga buhat.

Pananglitan, niadtong 2016, masaka nga ngadto sa 51% ang miboluntaryog pagpakuha og dugo  kay ming-abut na sa 2809 ka blood units kon itandi sa 5,459 ka blood units nga nakuha agi og hulip sa dugo nga nagamit.

Niadtong 2017, hingpit na nga naapsan ang kadaghanon sa nakolektang dugo gikan sa mga mingboluntaryo nga magpakuha kon itandi sa pugos nga paghulip sa dugo nga nagamit.
Sa 2017, misaka na sa 7157 ka blood units ang nakuha gikan sa boluntaryo nga pagpakuha, kon itandi sa 3937 blood units nga gikan sa hulip sa dugo nga nagamit.

Sa 2018, mipadayon pagsulbong ang kadaghanon sa dugo nga giboluntaryo og hatag kon itandi sa nakuha sa mga blood bank agi og hulip sa nagamit sa mga pasyente.

8641 ka blood units ang nakolekta sa boluntaryo nga paagi, segun pa sa GCGMH, kon itandi sa 2644 ka blood units nga hulip ang kinatibuk-an nga nakuha sa GCGMH, segun sa taho sa Blood Bank Section Head Nestor Bompat.

Hinuon, bisan pa sa kasamtangan nga nakab-ut nga kadaghanon sa dugo, kuwang pa gihapon kini sa kinatibuk-an nga panginahanglan, segun pa ni nurse Milagros Israel.

Dugang ni Israel, kinsa maoy coordinator sa Bohol blood services nga naa sa Provincial Health Office, ang World Health Organization una na nga napahayag nga alang sa mas luwas nga banabana, kinahanglang makapundo ang usa  ka lugar og katumbas sa usa  ka porsyento sa kinatibuk-an nga populasyon niini.

Ang Bohol adunay populasyon nga dul-an na sa 1.3 milyones, hinungdan nga kinahanglan may 13,000 ka blood units nga makolekto sa matag tuig, aron makab-ut kini nga tumong.

Gawas pa, sa nagkadaghan nga kaso sa aksidente sa kadalanan, dengue, kanser ug pagpanganak sa cesarian section, mas daghan pa nga pundo nga dugo ang gikinahanglan karon, segun sa mga tinugyanan sa mga tambalanan. (rahc/PIA-7/Bohol)

Book online travel tickets in Asia, Australia and New Zealand at:
https://12go.asia/?z=3467325



Linkback: https://tubagbohol.mikeligalig.com/index.php?topic=91423.0