TUBAGBOHOL.com with Ligalig Mike Ortega

Into Your Heart => Anonymous Diary Blog => Topic started by: Ligalig-Mike on April 30, 2007, 01:51:10 PM

Title: Dili Pareha ni Hala
Post by: Ligalig-Mike on April 30, 2007, 01:51:10 PM
 Bangkok, Thailand - Si Nong Boy Ampong konsehal sa lungsod sa Guindulman dinhi sa atong probinsya.

Niadtong daklit nakong pagbisita sa atong dakbayan, nagkaestorya mi ni Nong Boy. Usa sa mga butang nga akong napangutana niya mao nga ngano wala na siya magpasubli isip kagawad sa Guindulman.

Napili si Nong Boy nga kagawad niadtong tuig 2004, ug karon hingpit na siya nakahukom nga motalikod sa politika bisan aduna pa siyay duha ka termeno (unom ka tuig) nga mahimo pa siyang mosalmot sa bugnong lugaynon.

Matud niya nako nga ang nahibilin nga katuigan sa iyang kinabuhi iyang igahin alang sa pagpangalagad sa Ginoo. Hinuon, makapangalad man gihapon siya sa Diyos bisan anaa siya sa politika – ang iya lang nga ihurot ang tanan niyang kusog alang sa pagsimba sa Diyos.

Kung kini mao ang nakab-ot nga hukom ni Nong Boy Ampong, makaingon ko nga dalaygon ang iyang tinguha sa kinabuhi.

Sama pananglit sa bana sa akong iyaan sa Anda nga si Herminio Tinio.

Karong eleksyona nakahukom usab siya nga dili na moapil sa politika. Si Yoyo Hermino nakadesisyon nga didto na siya magbugtaw sa pagpanguma.

Ang iyang gibuhat karon nagsige siya pananom ug kahoy ug prutas sa mga yuta nga sa dugayng panahon wa gyud tikara sa mga tawo sa Anda. Daghang nag-ingon nga sa moabot nga katuigan, inubanan sa panalangin sa Ginoo, dako kaayo ug kaugmaon ang pagpanguma ug pagpananom ug kahoy ni Yoyo Hermino.

Tungod sa kalit nako nga pagbisita sa Anda, wala mi nagkaestorya ni Yoyo. Apan diha koy nadunggan nga estorya nga ang kabaho sa korapsyon nga nagapanghitabo sa munisipyo sa Anda nakapaaghat usab sa akong uyoan nga dili na moapil sa politika. Kini ako pang tin-awon gikan kaniya kung magkahinabi kami pag-usab.

Kining duha ka tawo nga atong gihisgutan karon nagpalahi sa ilang mga tinguha sa kinabuhi. Si Nong Boy Ampong ug Yoyo Hermino Tinio, imbis hinuon motungab sa gahom, nagpahilayo sila sa tubod kay napalgan nila ang bag-ong daganasan sa ilang kinabuhi.

Sa lahing bahin, nahisagmuyo ko nga namalandong sa gibuhat sa uban dinhi.

Ang ubang politico ilang anak maoy gipadagan ug mayor unya ang amahan maoy nagbise-mayor. Ang uban asawa mayor, bana bise mayor. Ang uban anak mayor, amahan o inahan ang mayor. Ang uban kabit ang mayor, ang laki maoy bise mayor – unya pagkahuman, ang laki napoy mayor. Makalibog nganong naingon niini, ug makalagot.

Labing makalagot kung itukmod ang usa ka anak pagdagan ug congressman nga walay hanaw sa politika ug pamunuan sa lungsod.

Asa naman diay atong delikadeza ani? Magpabaga nalang gyud ta sa atong nawong? Bisan nakahibawo ta nga daghan ang kasukaon sa atong gibuhat nga pagpalangsad sa atong anak, magpadayon gihapon ta sa atong hinakog nga tinguha?

Bisang asa dapita sa kalibutan, dinhi lang ni sa Pilipinas nahitabo nga grabe kaayo ang kahakog sa gahom sa politika sa mga giingong alagad sa katawhan (kono).

Nabutaan, nahilo, nalipong, ug nahubog sa gahom nga dili na makamao manamin sa hagawhaw sa katawhan.

Na hala, pailad gihapon ta. Na hala, magpatonto gihapon ta. Na hala, magpahulga lang gihapon ta.

Maayo nalang gani kay si Nong Boy Ampong ug Yoyo Hermino Tinio dili pareha ni Hala.

----------
written by Mike Ligalig, The Bohol Standard

comment from Kris Nueva:

i like to read your article about philippine politics.i wonder nganong magpasubli pa man dili nila tagaan ug chance ang uban nga maka kupot ug katungdanan.tinuod nang uban gikan sa uyoan igsoon amahan anak pag umangkon naa sa katungdanan unya magpasubli pa gyud.i hope people now will vote wisely.kanang dunay huna huna sa mga pobreng mga lumulopyo dinha sa ato. salamat....
Title: Re: Dili Pareha ni Hala
Post by: buenavista on June 02, 2007, 01:26:28 PM
dili lang kini nahitabo sa mga lungsod,gani hasta man pod sa amo na isla na grabe ang korapsyon.kapitan ra gani ang nagdala ani na isla pero wala namo damha na sila muapil pod ani!sa una ,sa akong nahimatngunan ang mga kapitan walay sweldo ug dili pa kinahanglan butaran,pero karon bayranay na sa boto.
Powered by SMFPacks SEO Pro Mod | Sitemap
Mobile View
SimplePortal 2.3.7 © 2008-2019, SimplePortal