Nahisagmuyo ko sa dihang pagbalik nako sa Thailand via Manila on board Cebu Pacific flight gisukit-sukit ko ug maayo sa airport immigration official ug nga daw buot mobabag sa akong pagbalik sa Thailand.
Bisan ug klaro kaayo nga aduna koy Student Visa nga gi-issue sa Thai Immigration two years ago ug nga kapin nako sa duha ka tuig nga nagngadto-nganhi sa Pilipinas ug Thailand, grabe pang sukit-sukit sa Manila Immigration nako.
Actually, kung gusto mong makakita sa nagyatak nga corruption, anaa sa airport inyong mahinagbuan. Liboan na ka mga Filipino nga moadto sa Thailand ang gipangbabagan sa immigration sa walay laing katarongan mao ang pagpangayo ug kwarta para makagawas ka sa Pilipinas.
Atong nahibaloan nga kung moadto ka sa Asean countries dili na ka magkinahanglan ug visa kung dili Filipino passport lang.
Pananglitan kung moadto ka sa Thailand, Malaysia, Vietnam, o kaha Indonesia, passport lang ang kinahanglanon kay automatic man nga tagaan ka ug tourist stamp upon arrival sa imong passport niining mga nasora. Dili usab ka kinahanglan ug visa kung moadto ka sa Hong Kong ug Singapore.
Dili na maihap sa mga true-to-life stories nga akong nahibaloan sa mga Filipino nga gipangayoan ug kwarta sa Immigration sa Manila. Ila lang gyud ka nga biklon ug estorya aron mokuot ka sa imong bulsa.
Makapungot ngano nga sukit-sukiton ka pa kung asa ka mopuyo, mag-unsa ka didto, nganong nia ka ug unsa pa nang mga way hinungdang pangutana. Luoy intawon tong mga bag-o pang mo-travel kay magulat man sa Immigration. Kung pamati sa Immigration nga magulat ka nila, it means money for them. Shameless corruption.
Ang nakaparat man gud ani kay inig abot nimo sa Thailand o sa bisan asang dapit sa Southeast Asia, walay pupangutana ang mga Immigration Official nimo kung ngano nga nagtravel ka. Niadtong pag-adto nako sa Hong Kong ug China, dretso-dretso man lang ug tatak sa imong passport ang immigration. No questions asked. Labina sa Thailand, way kuti-kuti iniglinya nimo sa immigration sa airport.
Nabali ang nahitabo dinhi sa ato. Ang Filipino immigration official kusog kaayo mosukot-sukot sa usa ka Filipino nga motravel nga mura ba ug criminal ka nga gidudahan nga moikyas sa Pilipinas nga klaro man nga wala kay hold-departure-order sa NBI. Naa pay travel tax nga labihang mahala ug airport terminal fee, pwera gaba, apan hisgutan ra ni nato sa umaabot nga yugto dinhi sa Bohol Standard.
Sa ako nang gikaingon sa unahan, naghitak ang corruption sa airport. Ginoo nalang mahibawo aning mga tawhana. Mao dili na ko matingala ngano ang mga Filipino nga makagawas sa Pilipinas dili na ganahan mobalik kay bisan sa imong kataposang panamilit sa imong yutang natawhan, panginhason pa man imong bulsa sa Manila Immigration.
Hinuon public knowledge naman nimong kahugaw sa airport immigration. Ang wala lang seguro mahibalo ani kadtong mga wala pa maka-travel gawas sa nasod.
Kung mahitabo nga pangayoan mo ug kwarta sa airport immigration aron lang makagawas, ayaw ug hatag. Hinuon kuhaa ang pangalan anang buot mopahimulos kanimo ug isumbong sa media.
Ayaw usab pagulat anang sukit-sukit sa immigration kay gapa-O.A. lang na sila sa tumong ug tinguha nga pangwartahon ka.
Matingala nalang ka nga inig abot nimo sa imong destinasyon, welcome kaayo ang ilang mga immigration officials sa airport.
Pero sa ato, gamugtok lang ang mga nawong anang immigration nga daw mga buaya nga naniid kinsay sunod nga matukob nga mga igsuon nilang Filipino.
-
published by the Bohol StandardLinkback:
https://tubagbohol.mikeligalig.com/index.php?topic=13826.0