my Tumoy Sa Bangaw column
The Bohol StandardSa duha ka hugna atong nahisgutan dinhi sa lindog sa Tumoy Sa Bangaw ang sulat sa usa ka Boholana nga nagbahad nga dili paadtuon ang mga Bol-anon sa Amerika kay mag-TNT ug matod pa niya makadaot sa dungog sa mga Filipino didto. Ang iyang gitumbok sa maong akosasyon sila si Nila Montero ug Dr. Doloreich Dumaluan.
Ang panapos ko sa maong isyu mao nga ang atong kahimtang nagtug-an nga mga Filipino ra ang moduot sa mga Filipino.
Hapit na maughi ang akong paglaum nga duna pay kalamboan ning atong nasud tungod lagi sa atong mga kinaiya – ang kinaiya nga ang Filipino ra ang moduot sa mga Filipino.
Pamalandongi ang nahitabo sa mga biktima sa illegal recruitment. Pila ka mga kabtangan ug kaugmaon ang naimpatso tungod aning illegal recruitment. Pila ka mga tawo ang nagdangoy-ngoy ug minatay ug hilak human mailad sa mga Filipino recruiters kono.
Dili seguro kaayo mouylap ang atong kasuko kung ang nangilad mga foreign nationals – apan mga Filipino mismo ang nangilad sa iyang mga igsuong Filipino.
Ambot nalang! Asa na kaha ang konsensya sa mga Filipino?
Diha lang sa mga trabahoan, wala poy mga konsensya ang kadaghanang mga employer. Dili gani makapalit ug tarong lingkoranan alang sa mga workers nila nga mao ang nagpatubo sa ilang negosyo. Dili gani makahatag bisan baynte pesos nga pangsekwate alang sa mga tawong nagpatulo ug singot aron sila makwartahan. Dili gani makahatag ug bonus panahon sa Pasko isip pasalamat sa mga tawong nagsakripisyo aron ilang pitaka kanunay puno sa kwarta.
Mga adunahan nga dili mohatag ug tarong nga sweldo alang sa ilang mga trabahante. Mga tag-iya ug yuta nga gihimong ulipon ang ila ra usab nga mga kadugong Filipino.
Sa laktod nga pagkaestorya, daghan sa mga Filipino nga walay kasing-kasing para sa iyang kadugong Filipino.
Pipila sa akong mga higala sa gawas sa nasud mipaambit kanako ug taho nga sila didto sa mao ni, mao nang nasud nga diin mga Filipino ra pud ang modaut sa isig ka Filipino. Gani pa man bisan ang uban pareha ra ug lungsod o probinsya ang gigikanan, apan dili magkasinabot. Bisan duha ra sila, maglain gyud ug grupo o kapunungan para mahimo lang “presidente.â€
Lahi ang kasinatian nako diri sa Thailand. Wa man unta makaila ug Ginoo ug Kristiyanismo ning mga Thai, apan ang ilang mga kinaiya tugob sa kaaghop ug kamadanihon.
Daghan sa akong mga higalang Thai ang madali-dali nako ug sangpit sa panahon sa akong kapit-os. Kapin nako sa usa ka tuig sa Thailand, wala gyuy nagbinuang nga Thai nako. Apan. Apan.
Na-break ang record. Diha ra gyuy nagbinuang nako. Taga-Mindanao. Obedencio ang apilyedo. Unta dili sila paryente ni Ric Obedencio, akong suod nga higala sa media sa Bohol.
Tiaw mo bay gipapuyo nako sa giabangan kong apartment kay lagi bag-o siyang abot sa Thailand. Wala na gud siya magbayad ug advanced two months nga bayad ug security deposit kay ako naman ang nagbayad ani.
Kabalo mo unsa iyang gibuhat?
Sa adlaw nga kuhaon ko na unta ang akong security deposit gikan sa tag-iya sa apartment, ang akong gipapuyo maoy mikuha na diay ug una-una sa maong security deposit nga way pananghid nako. Ang nakaparat kay sa dihang gisukmatan nako ngano nga gikuha niya, giingnan lang ko nga ang kwarta tua iyang gipahawiran ni Talpolana ug kinsa pa nang mga ngalan nga hinganlan.
Hangtud nga nakadawat nalang ko ug balita, human sa daghang limud ug bakak, nga nagasto kono ang kwarta ni Talpolana. Pagkabinuang. Dili iyang kwarta apan iyang gihatag ni Talpolana. Ako siyang gisukmatan: “Bisan ang labing bulok sa kalibutan, way motuo anang imong bot-bot.â€
Akong gisultihan akong mga higala. Pareha sila ug reaksyon tanan: “Baga-a gud niya ug nawong!â€
To add insult to the injury, hangtud karon wa niya iuli ang akong mga gamit sa kwarto hangtud ang kataposan kong karsones ug unlan. Daghan kaayo ko ug mga gamit nga nahanaw. Kapila nako mo-e-mail niya ug naghangyo nga iuli ang akong mga butang, apan hangtud karon, wa gyud motubag sa akong mga e-mails.
Filipino lagi unta pero diri sa Thailand Filipino ra usab ang mitamak nako.
Kung daghan sa mga Filipino ang pareha ug kinaiya sa maong Obedencio nga taga-Bukidnon, I doubt kung naay kaugmaon ang atong nasud.
Linkback:
https://tubagbohol.mikeligalig.com/index.php?topic=3275.0