MikeLigalig.com

         

                               TUBAG BOHOL
 
      Naunsa na kaha?
      Kanus-a ba?
      Unsay hinungdan?
      Ngano man?
      Kumusta na sila?

      Panggagho.......Kamingaw.....Gimingaw!

      Mga mabaw nga pangutana maoy naghari,
      Tubag Bohol kanus-a ka namugna?
      Gikan ka sa usa ka utokang alimpatakan
      kanimo hinandom nga Bohol nahilayo.
      Sa matahom ug maputing kabay-bayonan...
      diin kini sa tuman gikamingawan.

      Ingon man sa hugot nga ma-init nga gakos sa
      mga kinabuhing halayo nga gimahal.
      Gihagit sa kapit-os sa hapak sa balod,
      gidan-as sa halayong lawod.
      Tam-is nga halok sa lab-as nga Bol-anong
      kahanginan, unta ma-oy bout pahimuslan.
      Apan ang tanan gihikaw sa palaran sa dakong
      kasub-anan.
     
      Hain ka?
      Kalayo ba?

      Taas nga panghupaw, sakit nga pangandoy
      Milanog sama sa kidhat sa kilat sa tibouk kalibotan.
      Dinhi...gitubag ang tanan, nakaplagan ang katim-os sa
      hinungdan sa tiunay nga panaghigala-ay.
      Ang lanog nga siyagit sa mga pangutanang
      dugay nga wala nay mga saktong tubag

      Kumusta ba?
      Unsa na kaha?
      Kamingaw ug kala-ay.....

      Ang gugma sa kahigwaos giantos hangtod
      nga kining tanan sa ubang halayong Bol-anon
      nasabwag ug nadunggog..

      Hain man?
      Kinsa ka?
      Taga asa ka?

      Sa hamubong panahon Tubag Bohol
      ikaw gitapok-an, gihilakan ka sa balitang
      puno sa kasub-anan, binaylo-ay sa masakit
      nga pulong  sa mga pinasidunggang  bangiitan
      ug pilosopo way saktong baroganan.
      Kukabildohay bisan usahay dili dako
      ang hinungdan, walay tagad ang kakapoy
      bisan kami hikabuntagan.

      Na-amgohan sa tanan ang pagdim-dim
      sa katam-is sa hudyaka sa panagkita.
      Hugpong nga panaghi-usa, pagtinabanggay
      Luha sa kalipay gustong akuptan,
      ang tanang kasakit sa kalit gisalikway.
   
      Kabos mong anak, kaliwat ni Sikatuna ug Dagohoy
      sa laing Nasod nadunggog ang tanan.
      Bahakhak sa way tupong nga kalipay
      Kay lagi parehas nga dugo sa ugat nga galatay.

      Unsa man kini?
      Hangtod kanus-a?

      Bog-bog singgot sa paningkamot
      alang sa imong kalamboan
      Buhong ug timawa, bangiitan ug dili
      bisan mga pilosopo man gani ikaw
      walay ginapili.

      TUBAG BOHOL....kami kanimo naminaw
      isip mga boutan nga anak nga bisan
      asa nga hilit sa kalibotan nagkatibula-ag
      Diin ang gugma nga matinud-anon
      migamot, hinaut unta ang atong 
      gitagamtam nga kalipay molambo
      ug kini magpabilin sa atong kasing-kasing
      hangtod ugma damlag.


Gipahinungod ko kining mga pulonga ngadto ni Mr. Mike Ligalig, ang atong TB Administrator
Lavoo dear Mike!
 Bambi
 July 30, 2008

       

Linkback: https://tubagbohol.mikeligalig.com/index.php?topic=14185.0